ലോകകപ്പിൽ സൗദി അറേബ്യക്കെതിരെ സ്പെയിൻ 4-0ന് വിജയിച്ച മത്സരത്തിലെ മികച്ച പ്രകടനത്തിന് പിന്നാലെ ബാഴ്സലോണ വിങ്ങർ ലമിൻ യമാലിനെ വാനോളം പുകഴ്ത്തി വെയ്ൻ റൂണി.

മത്സരത്തിൽ സ്കോറിങ് തുടങ്ങിയതും വെറും 45 മിനിറ്റ് മാത്രം കളിക്കളത്തിൽ ചിലവഴിച്ചതുമായ യമാൽ അന്താരാഷ്ട്ര ഫുട്ബോളിലെ തന്റെ കുതിപ്പ് തുടരുകയാണ്. ഇംഗ്ലണ്ടിന്റെ എക്കാലത്തെയും മികച്ച താരങ്ങളിലൊരാളായ റൂണിയുടെ പ്രശംസയും ഈ കൗമാരതാരത്തെ തേടിയെത്തി.

ബിബിസിക്ക് വേണ്ടി സംസാരിക്കവെയാണ് ഈ കൗമാരതാരത്തിന്റെ കഴിവിനെ റൂണി അഭിനന്ദിച്ചത്.

“എനിക്ക് ലമിൻ യമാലിനെ വലിയ ഇഷ്ടമാണ്, അവനെ കാണുമ്പോൾ തന്നെ സന്തോഷം തോന്നാറുണ്ട്,” റൂണി പറഞ്ഞു.

സ്പാനിഷ് വിങ്ങറുടെ കളിബുദ്ധിയാണ് ഏറ്റവും ശ്രദ്ധേയമെന്ന് മുൻ മാഞ്ചസ്റ്റർ യുണൈറ്റഡ് സ്ട്രൈക്കർ ചൂണ്ടിക്കാട്ടി.

“അസാധാരണമായ ഫുട്ബോൾ ബുദ്ധിയാണ് അവനുള്ളത്, അത് ആർക്കും പഠിപ്പിച്ചു കൊടുക്കാൻ കഴിയുന്ന ഒന്നല്ല.”

സ്പെയിൻ ടീമിലെ യമാലിന്റെ സാന്നിധ്യം ടീമിന് മൊത്തത്തിൽ ഉണർവേകുന്നതായും റൂണി അഭിപ്രായപ്പെട്ടു.

“സ്പാനിഷ് ദേശീയ ടീമിന് അവൻ നൽകുന്നത് വലിയ ആത്മവിശ്വാസമാണ്. അവന്റെ സാന്നിധ്യത്തിൽ 16-ാം വയസ്സിൽ തന്നെ അവർ യൂറോപ്യൻ ചാമ്പ്യൻഷിപ്പ് വിജയിച്ചു.”

സ്പെയിനിന്റെ ലോകകപ്പ് ക്യാമ്പെയ്‌ന് മുന്നോടിയായി, 18-ാം വയസ്സിൽ ഈ വിങ്ങർ കൂടുതൽ കരുത്താർജ്ജിച്ചുവെന്ന് അദ്ദേഹം വിശ്വസിക്കുന്നു.

“ഇപ്പോൾ അവൻ കൂടുതൽ പക്വതയുള്ളവനും മികച്ചവനുമാണ്. 18 വയസ്സുകാരനായ യമാൽ ഈ ലോകകപ്പ് നേടാൻ ടീമിന് ആവശ്യമായ ആത്മവിശ്വാസവും വിശ്വാസവും നൽകുന്നുണ്ട്.”