ഖത്തറിനെതിരെ ഏകപക്ഷീയമായ ആറ് ഗോളുകൾക്ക് തകർപ്പൻ വിജയം നേടി കാനഡ ഫിഫ ലോകകപ്പിൽ ആദ്യ ജയം സ്വന്തമാക്കി. ഈ വിജയത്തോടെ ഗ്രൂപ്പ് ബിയിൽ സ്വിറ്റ്സർലൻഡിനെ മറികടന്ന് കാനഡ പോയിന്റ് പട്ടികയിൽ ഒന്നാമതെത്തി. മത്സരത്തിൽ ഹാട്രിക് നേടിയ ജോനാഥൻ ഡേവിഡാണ് കാനഡയുടെ വിജയത്തിന് ചുക്കാൻ പിടിച്ചത്.
മത്സരത്തിലുടനീളം കാനഡയുടെ ആധിപത്യമായിരുന്നു കണ്ടത്. കൈൽ ലാറിൻ ടീമിനായി ആദ്യ ഗോൾ നേടിയപ്പോൾ, ജോനാഥൻ ഡേവിഡ് പിന്നീട് മൂന്ന് ഗോളുകൾ അടിച്ചുകയറ്റി. ഇതിനുപുറമെ നഥാൻ സാലിബയുടെ തകർപ്പൻ ഫ്രീക്കിക്ക് ഗോളും മൊഹമ്മദ് മനായിയുടെ സെൽഫ് ഗോളും കാനഡയുടെ സ്കോർ ബോർഡിൽ ഇടംപിടിച്ചു. എന്നാൽ, ഈ വിജയം കാനഡയ്ക്ക് ചെറിയ തിരിച്ചടിയും നൽകി. കളിക്കിടെ പരിക്കേറ്റ കാനഡയുടെ മിഡ്ഫീൽഡർ ഇസ്മായിൽ കോനെയെ സ്ട്രെച്ചറിലാണ് ഗ്രൗണ്ടിൽ നിന്ന് പുറത്തെത്തിച്ചത്.
പ്രതിരോധനിരയിലെ പിഴവുകളും കളിക്കാരെ നഷ്ടപ്പെട്ടതും ഖത്തറിന് കനത്ത തിരിച്ചടിയായി. ആദ്യ പകുതിയിൽ ഹോമാം അഹമ്മദും രണ്ടാം പകുതിയിൽ അസിം മദിബോയും ചുവപ്പ് കാർഡ് കണ്ട് പുറത്തായതോടെ ഒൻപത് പേരുമായാണ് ഖത്തർ മത്സരം പൂർത്തിയാക്കിയത്. ഗ്രൂപ്പ് ഘട്ടത്തിലെ അവസാന മത്സരത്തിൽ ജൂൺ 24-ന് സ്വിറ്റ്സർലൻഡിനെതിരെയാണ് കാനഡയുടെ മത്സരം. അന്ന് തന്നെ ബോസ്നിയ ആൻഡ് ഹെർസഗോവിനയെ ഖത്തറും നേരിടും.