32-കാരനായ റോബർട്ട്‌സൺ ഒൻപത് വർഷത്തിനിടെ റെഡ്‌സിനായി 377 മത്സരങ്ങളിൽ ബൂട്ടണിഞ്ഞു. 2017-ൽ ഹൾ സിറ്റിയിൽ നിന്ന് വെറും 8 ദശലക്ഷം പൗണ്ടിന് ലിവർപൂളിലെത്തിയ അദ്ദേഹം ചാമ്പ്യൻസ് ലീഗ്, രണ്ട് പ്രീമിയർ ലീഗ് കിരീടങ്ങൾ ഉൾപ്പെടെ നിരവധി നേട്ടങ്ങളിൽ പങ്കാളിയായി.

ഞായറാഴ്ച ബ്രെന്റ്‌ഫോർഡിനെതിരായ അവസാന മത്സരത്തിന് മുന്നോടിയായി നൽകിയ അഭിമുഖത്തിൽ തന്റെ ആനഫീൽഡ് കരിയറിലെ നിർണായക നിമിഷങ്ങളെക്കുറിച്ച് താരം മനസ്സ് തുറന്നു. 2019-ലെ ചാമ്പ്യൻസ് ലീഗ് വിജയമാണ് തന്റെ കരിയറിലെ ഏറ്റവും വലിയ നേട്ടമെന്ന് അദ്ദേഹം പറഞ്ഞു. “ആ ദിവസവും രാത്രിയും, പിറ്റേദിവസത്തെ പരേഡും… എന്റെ ഉറ്റ സുഹൃത്തുക്കൾക്കൊപ്പമാണ് അത് ആഘോഷിച്ചത്. എന്റെ കുട്ടികളും വിവാഹവും മാറ്റിനിർത്തിയാൽ, ജീവിതത്തിലെ ഏറ്റവും മികച്ച 24 മുതൽ 48 മണിക്കൂർ വരെയായിരുന്നു അത്,” റോബർട്ട്‌സൺ വ്യക്തമാക്കി.

2020-ൽ കോവിഡ് കാലത്ത് ആരാധകരില്ലാതെ കിരീടം നേടേണ്ടി വന്ന സാഹചര്യം അദ്ദേഹം ഓർത്തു. അതുകൊണ്ട് തന്നെ കഴിഞ്ഞ സീസണിൽ ടോട്ടൻഹാമിനെതിരെ 5-1ന് വിജയിച്ച് കിരീടം ഉറപ്പിച്ചത് തനിക്ക് ഏറെ പ്രത്യേകതയുള്ളതാണെന്നും താരം കൂട്ടിച്ചേർത്തു.

ഈ സീസണിലെ പ്രയാസങ്ങളെക്കുറിച്ചും അദ്ദേഹം തുറന്നുപറഞ്ഞു. സഹതാരം ഡിയോഗോ ജോട്ടയുടെ വിയോഗം ടീമിനെ എങ്ങനെ ബാധിച്ചു എന്ന് റോബർട്ട്‌സൺ വിശദീകരിച്ചു. “വേനൽക്കാലത്ത് ഞങ്ങൾ കടന്നുപോയ അവസ്ഥ… മറ്റൊരു ടീമും അതുപോലെ അനുഭവിച്ചിട്ടുണ്ടാകില്ല. ആഴ്ചകളോളം ഞങ്ങൾക്ക് ഫുട്ബോളിനെക്കുറിച്ച് ചിന്തിക്കാൻ പോലും കഴിഞ്ഞില്ല. ആർക്കും പരിശീലനത്തിന് ഇറങ്ങാൻ പോലും താല്പര്യമുണ്ടായിരുന്നില്ല,” അദ്ദേഹം പറഞ്ഞു.

ഈ സീസണിലെ അസ്ഥിരമായ പ്രകടനങ്ങൾക്കിടയിലും ലിവർപൂളിന്റെ ഭാവിയിൽ തനിക്ക് വലിയ പ്രതീക്ഷയുണ്ടെന്ന് അദ്ദേഹം പറഞ്ഞു. “വീണ്ടും നേട്ടങ്ങൾ കൈവരിക്കാനുള്ള കരുത്ത് ലിവർപൂളിന്റെ ഡ്രസ്സിംഗ് റൂമിലുണ്ട്.”

ഫാബ്രിസിയോ റൊമാനോയുടെ റിപ്പോർട്ടുകൾ പ്രകാരം, ഈ വേനൽക്കാലത്ത് ഫ്രീ ട്രാൻസ്ഫറിലൂടെ ടോട്ടൻഹാമിൽ ചേരാൻ റോബർട്ട്‌സൺ ധാരണയിലെത്തിയിട്ടുണ്ട്. ടോട്ടൻഹാം പ്രീമിയർ ലീഗിൽ നിലനിൽക്കുന്നത് അനുസരിച്ചായിരിക്കും ഈ കരാർ. അതിനുമുമ്പ് സ്കോട്ട്‌ലൻഡിനൊപ്പം തന്റെ ആദ്യ ലോകകപ്പ് കളിക്കാനുള്ള തയ്യാറെടുപ്പിലാണ് താരം. 1998-ന് ശേഷം ആദ്യമായാണ് സ്കോട്ട്‌ലൻഡ് ലോകകപ്പിന് യോഗ്യത നേടുന്നത്.