പ്രൊഫഷണൽ ഫുട്ബോളിൽ നിന്ന് വിരമിക്കുന്നതായി സ്പാനിഷ് പ്രതിരോധ താരം സെസാർ അസ്പിലിക്വേറ്റ പ്രഖ്യാപിച്ചു. ഈ സീസണോടെ താൻ കരിയർ അവസാനിപ്പിക്കുമെന്ന് 36-കാരനായ താരം വെള്ളിയാഴ്ച ഔദ്യോഗികമായി അറിയിച്ചു. ഇതോടെ ഇരുപത് വർഷം നീണ്ട ശ്രദ്ധേയമായ ഫുട്ബോൾ കരിയറിനാണ് തിരശ്ശീല വീഴുന്നത്.

“ഈ സീസൺ പ്രൊഫഷണൽ ഫുട്ബോളിലെ എന്റെ അവസാന സീസണായിരിക്കുമെന്ന് നിങ്ങളോട് പങ്കുവെക്കാൻ ആഗ്രഹിക്കുന്നു. വർഷങ്ങളോളം എന്റെ സ്വപ്നത്തിൽ ജീവിച്ചതിന് ശേഷം, ജീവിതത്തിൽ ഒരു പുതിയ അധ്യായം തുടങ്ങാൻ സമയമായെന്ന് ഞാൻ കരുതുന്നു,” അസ്പിലിക്വേറ്റ കുറിച്ചു. പാംപ്ലോണയിൽ തുടങ്ങി ഒസാസുന, മാഴ്സെ, ചെൽസി, അത്ലറ്റിക്കോ മാഡ്രിഡ്, സെവിയ്യ എന്നീ ക്ലബ്ബുകൾക്കായും സ്പെയിൻ ദേശീയ ടീമിനായും കളിക്കാൻ സാധിച്ചതിലുള്ള നന്ദിയും അദ്ദേഹം അറിയിച്ചു.

തന്റെ നേതൃപാടവം കൊണ്ടും കളിക്കളത്തിലെ വൈദഗ്ധ്യം കൊണ്ടും ശ്രദ്ധേയനായ താരമാണ് അസ്പിലിക്വേറ്റ. ചെൽസിയിൽ കളിക്കുമ്പോൾ ടീമിനൊപ്പം എല്ലാ പ്രധാന ട്രോഫികളും സ്വന്തമാക്കാൻ അദ്ദേഹത്തിന് കഴിഞ്ഞു. തൻ്റെ കരിയറിലുടനീളം മികച്ച പ്രൊഫഷണലിസവും സ്ഥിരതയും പുലർത്തിയ താരം യൂറോപ്യൻ ഫുട്ബോളിൽ വലിയ മതിപ്പാണ് നേടിയെടുത്തത്.