ഐൻട്രാക്റ്റ് ഫ്രാങ്ക്ഫർട്ടിന്റെ മികച്ച യുവതാരമായ കാൻ ഉസുനെ വേനൽക്കാല ട്രാൻസ്ഫർ വിപണിയിൽ സ്വന്തമാക്കാൻ ഗലാറ്റസരെ പദ്ധതിയിടുന്നതായി റിപ്പോർട്ടുകൾ. ഇതിന്റെ ഭാഗമായി ക്ലബ്ബ് നീക്കങ്ങൾ സജീവമാക്കിയിരിക്കുകയാണ്.

വരുന്ന ദിവസങ്ങളിൽ ഗലാറ്റസരെ മുഖ്യ പരിശീലകൻ ഒകാൻ ബുറുക്കും ക്ലബ്ബ് പ്രസിഡന്റ് ദുർസൻ ഓസ്ബെക്കും കൂടിക്കാഴ്ച നടത്തും. ഈ ചർച്ചയിൽ ഉസുന്റെ ട്രാൻസ്ഫർ സംബന്ധിച്ച വിഷയങ്ങളും ഉൾപ്പെടുത്തുമെന്നാണ് വിവരം.

20 വയസ്സുകാരനായ തുർക്കിഷ് അറ്റാക്കിംഗ് മിഡ്‌ഫീൽഡർ ഈ സീസണിൽ മികച്ച പ്രകടനമാണ് പുറത്തെടുക്കുന്നത്. 10 ഗോളുകളും ആറ് അസിസ്റ്റുകളും സ്വന്തമാക്കിയ താരം ബുണ്ടസ്ലീഗയിലെ ശ്രദ്ധേയമായ താരോദയമായി മാറിക്കഴിഞ്ഞു.

ഉസുന് തുർക്കിഷ് പൗരത്വം ഉള്ളതിനാൽ ഗലാറ്റസരെയുടെ വിദേശ താരങ്ങളുടെ ക്വാട്ടയെ ഇത് ബാധിക്കില്ല. താരത്തെ വിട്ടുനൽകുന്നതിനായി 50-60 ദശലക്ഷം യൂറോ വരെ ഐൻട്രാക്റ്റ് ഫ്രാങ്ക്ഫർട്ട് ആവശ്യപ്പെട്ടേക്കും.

ലോകകപ്പിനായുള്ള തുർക്കി ദേശീയ ടീമിന്റെ പ്രാഥമിക സ്‌ക്വാഡിലും കാൻ ഉസുൻ ഇടംപിടിച്ചിട്ടുണ്ട്.