2026 ഫിഫ ലോകകപ്പിന് ഒരു മാസം മാത്രം ബാക്കിനിൽക്കെ ടൂർണമെന്റ് വിവിധ വിവാദങ്ങളിൽ അകപ്പെട്ടിരിക്കുകയാണ്. ഇറാനിയൻ ടീമിന്റെ പങ്കാളിത്തവും ലോകകപ്പ് ടിക്കറ്റുകളുടെ ഉയർന്ന നിരക്കും നേരത്തെ തന്നെ ചർച്ചയായിരുന്നു. ഇതിനു പിന്നാലെ, ഡെമോക്രാറ്റിക് റിപ്പബ്ലിക് ഓഫ് കോംഗോയിലെ എബോള ബാധയെത്തുടർന്ന് തങ്ങളുടെ ഹോം ഗ്രൗണ്ടിൽ നടത്താനിരുന്ന ലോകകപ്പ് മുന്നൊരുക്ക ക്യാമ്പ് ടീം റദ്ദാക്കിയതായി റിപ്പോർട്ടുകളുണ്ട്.
കഴിഞ്ഞ വെള്ളിയാഴ്ചയാണ് കിഴക്കൻ ഡിആർ കോംഗോയിൽ എബോള പൊട്ടിപ്പുറപ്പെട്ടതായി സ്ഥിരീകരിച്ചത്. ഏകദേശം 600 കേസുകൾ റിപ്പോർട്ട് ചെയ്യപ്പെട്ടതിൽ 130 പേർ ഇതിനകം മരണപ്പെട്ടുവെന്നാണ് വിവരം.
ഇതും വായിക്കുക: 30 വർഷത്തെ കാത്തിരിപ്പിനൊടുവിൽ അസ്റ്റൺ വില്ലയ്ക്ക് കിരീടം; അഞ്ചാം തവണയും യൂറോപ്പ ലീഗ് നേടി ഉനായ് എമ്മറി
കർശന പരിശോധനയോ അതോ പൂർണ്ണമായ വിലക്കോ?
എബോള ബാധയുടെ പശ്ചാത്തലത്തിൽ, കഴിഞ്ഞ 21 ദിവസത്തിനുള്ളിൽ ഡിആർ കോംഗോ, ഉഗാണ്ട, ദക്ഷിണ സുഡാൻ എന്നിവിടങ്ങളിൽ സന്ദർശനം നടത്തിയ വിദേശികൾക്ക് അമേരിക്ക പ്രവേശന വിലക്ക് ഏർപ്പെടുത്തിയിട്ടുണ്ട്. എന്നാൽ, കോംഗോ ടീമിന് ലോകകപ്പിനായി അമേരിക്കയിലേക്ക് യാത്ര ചെയ്യാൻ അനുമതി ലഭിക്കുമെന്ന് യുഎസ് ഉദ്യോഗസ്ഥൻ എഎഫ്പിയോട് പറഞ്ഞു. ടീം യൂറോപ്പിലാണ് പരിശീലനം നടത്തിയിരുന്നതെന്നതിനാൽ അവർക്ക് ഈ വിലക്ക് ബാധകമല്ലെന്നാണ് വിലയിരുത്തൽ. എങ്കിലും, ടീം അംഗങ്ങൾ ഈ രാജ്യങ്ങളിൽ സന്ദർശനം നടത്തിയിട്ടുണ്ടെങ്കിൽ അവർക്ക് പൂർണ്ണമായ വിലക്കിന് പകരം കർശനമായ ആരോഗ്യ പരിശോധനകൾക്ക് വിധേയരാകേണ്ടി വരും.
ലോകകപ്പ് സമയത്ത് ഹ്യൂസ്റ്റൺ ആയിരിക്കും ഡിആർ കോംഗോയുടെ ബേസ് ക്യാമ്പ്. ജൂൺ 17-ന് പോർച്ചുഗലിനെതിരെ ഹ്യൂസ്റ്റണിലാണ് അവരുടെ ആദ്യ ഗ്രൂപ്പ് കെ മത്സരം. തുടർന്ന് ജൂൺ 24-ന് ഗ്വാഡലജാരയിൽ വെച്ച് കൊളംബിയയെയും, ജൂൺ 28-ന് അറ്റ്ലാന്റയിൽ വെച്ച് ഉസ്ബെക്കിസ്ഥാനെയും അവർ നേരിടും.
എബോള ബാധയെ അന്താരാഷ്ട്ര ആരോഗ്യ അടിയന്തരാവസ്ഥയായി ലോകാരോഗ്യ സംഘടന (WHO) പ്രഖ്യാപിച്ചിട്ടുണ്ട്. നിലവിലെ എബോള വൈറസ് അപൂർവ്വമായ ഒന്നാണ്. ഇതിന് വാക്സിൻ ലഭ്യമല്ല എന്നത് സാഹചര്യം കൂടുതൽ സങ്കീർണ്ണമാക്കുന്നു. കൂടാതെ, സംഘർഷം നിലനിൽക്കുന്ന പ്രദേശത്താണ് രോഗം പടർന്നിരിക്കുന്നത്.
വൈറസ് മൂലമുണ്ടാകുന്ന അപൂർവ്വവും മാരകവുമായ രോഗമാണ് എബോള. പഴം തീനി വവ്വാലുകൾ പോലുള്ള മൃഗങ്ങളിൽ നിന്നാണ് രോഗം പടരുന്നത്. അണുബാധയുള്ള മൃഗങ്ങളെ കഴിക്കുകയോ കൈകാര്യം ചെയ്യുകയോ ചെയ്യുമ്പോൾ മനുഷ്യരിലേക്ക് രോഗം പകരാം. രോഗലക്ഷണങ്ങൾ 2 മുതൽ 21 ദിവസത്തിനുള്ളിൽ പ്രകടമാകും. പനി, തലവേദന തുടങ്ങിയ ലക്ഷണങ്ങളോടെ തുടങ്ങുന്ന രോഗം പിന്നീട് ഛർദ്ദി, വയറിളക്കം എന്നിവയിലേക്ക് നയിക്കുകയും അവയവങ്ങളുടെ പ്രവർത്തനത്തെ തകരാറിലാക്കുകയും ചെയ്യും. ചില രോഗികളിൽ ആന്തരികവും ബാഹ്യവുമായ രക്തസ്രാവവും കണ്ടുവരുന്നു.
രോഗബാധിതരുടെ രക്തം, ഛർദ്ദി തുടങ്ങിയ സ്രവങ്ങളുമായി നേരിട്ടുള്ള സമ്പർക്കത്തിലൂടെയാണ് എബോള ഒരാളിൽ നിന്ന് മറ്റൊരാളിലേക്ക് പകരുന്നത്.