യുവന്റസ് വിട്ട് സീരി എ-യ്ക്ക് പുറത്ത് കരിയർ തുടരാൻ ഒരുങ്ങുകയാണ് ദുസാൻ വ്‌ലഹോവിച്ച്. ബയേൺ മ്യൂണിക്ക്, അത്‌ലറ്റിക്കോ മാഡ്രിഡ്, ചെൽസി തുടങ്ങിയ ക്ലബ്ബുകൾ താരത്തെ സ്വന്തമാക്കാൻ താൽപ്പര്യം പ്രകടിപ്പിച്ചിട്ടുണ്ടെന്ന് ടുട്ടോസ്പോർട്ട് റിപ്പോർട്ട് ചെയ്യുന്നു.

കരാർ ചർച്ചകൾക്കിടെയുണ്ടായ അഭിപ്രായവ്യത്യാസങ്ങളാണ് താരം ക്ലബ്ബ് വിടുന്നതിലേക്ക് നയിച്ചത്. യുവന്റസിന്റെ നിലവിലെ ശമ്പള ഘടനയെ വ്‌ലഹോവിച്ച് ചോദ്യം ചെയ്യുകയും, ജോനാഥൻ ഡേവിഡിനേക്കാൾ ഉയർന്ന പ്രതിഫലം തനിക്ക് ലഭിക്കണമെന്ന് വാദിക്കുകയും ചെയ്തു.

“എന്തുകൊണ്ട് എനിക്ക് ഡേവിഡിനെപ്പോലെ മാത്രം പ്രതിഫലം നൽകുന്നു?” എന്ന് കൂടിക്കാഴ്ചയ്ക്കിടെ താരം ചോദിച്ചതായി റിപ്പോർട്ടുകളുണ്ട്. ഈ പരാമർശം യുവന്റസ് ഡയറക്ടർമാരെ ചൊടിപ്പിക്കുകയും കരാർ പുതുക്കാനുള്ള ചർച്ചകൾ തടസ്സപ്പെടുകയുമായിരുന്നു.

കരാർ ചർച്ചകൾ അവസാനിച്ചതായി യുവന്റസ് ഡയറക്ടർ ജോർജിയോ ചിയേല്ലിനി സ്ഥിരീകരിച്ചിട്ടുണ്ട്. ഇതോടെ സെർബിയൻ സ്ട്രൈക്കർ ക്ലബ്ബ് വിടുമെന്ന് ഉറപ്പായി. അദ്ദേഹത്തിന്റെ ശമ്പള ആവശ്യങ്ങൾ നിറവേറ്റാൻ സീരി എ-യിലെ മറ്റ് ക്ലബ്ബുകൾക്ക് സാധിക്കില്ലെന്നാണ് വിലയിരുത്തൽ.

കരാറിന്റെ അവസാന വർഷത്തിൽ ബോണസുകൾ ഉൾപ്പെടെ 12 മില്യൺ യൂറോയായിരുന്നു വ്‌ലഹോവിച്ച് പ്രതിഫലമായി വാങ്ങിയത്. എന്നാൽ, പുതിയ ശമ്പള ഘടനയുടെ ഭാഗമായി ജോനാഥൻ ഡേവിഡിന്റേതിന് സമാനമായ കുറഞ്ഞ പാക്കേജാണ് യുവന്റസ് വാഗ്ദാനം ചെയ്തത്. എന്നാൽ എട്ട് മില്യൺ യൂറോയും അതിനുമപ്പുറമുള്ള ബോണസുമാണ് താരം ആവശ്യപ്പെട്ടത്.

ക്ലബ്ബ് നിലവിൽ ഏഴ് മില്യൺ യൂറോ എന്ന ശമ്പള പരിധി നിശ്ചയിച്ചിട്ടുണ്ട്. കെനാൻ യിൽദിസ് മാത്രമാണ് ഇപ്പോൾ ഈ പരിധിയിൽ ക്ലബ്ബിലുള്ളത്.

നാപ്പോളി വ്‌ലഹോവിക്കിന്റെ പ്രതിനിധികളുമായി ചർച്ച നടത്തിയതായി ഇറ്റാലിയൻ മാധ്യമങ്ങൾ റിപ്പോർട്ട് ചെയ്തിരുന്നു. എന്നാൽ കരാർ ചർച്ചകൾ പരാജയപ്പെട്ടതോടെ യൂറോപ്പിലെ വമ്പൻ ക്ലബ്ബുകൾ താരത്തെ സ്വന്തമാക്കാൻ കൂടുതൽ സജീവമാകും.