ലമിൻ യമാലിന്റെ പരിക്ക് ബാഴ്സലോണയ്ക്ക് വലിയ തിരിച്ചടിയെന്ന് ഗവി
സെൽറ്റയ്ക്കെതിരായ മത്സരത്തിൽ ബാഴ്സലോണ 1-0 ന് വിജയിച്ചതിന് ശേഷമുള്ള അഭിമുഖത്തിൽ ലമിൻ യമാലിന്റെ പരിക്കിനെക്കുറിച്ച് പ്രതികരിക്കവെ, ഇത് ടീമിന് വലിയൊരു തിരിച്ചടിയാണെന്ന് മധ്യനിര താരം ഗവി പറഞ്ഞു.
“എന്നെ സംബന്ധിച്ചിടത്തോളം ലമിൻ ഏറ്റവും മികച്ച താരമാണ്,” മാധ്യമപ്രവർത്തകനോട് ഗവി വ്യക്തമാക്കി. ലമിൻ യമാലിന്റെ പരിക്കിനെക്കുറിച്ച് സംസാരിക്കുമ്പോൾ ഗവി അല്പം വൈകാരികമായാണ് പ്രതികരിച്ചത്. “ഇതൊരു മോശം കാര്യമാണ്. ഇതിന്റെ ആഘാതം കുറവായിരിക്കുമെന്ന് ഞാൻ പ്രതീക്ഷിക്കുന്നു,” ഗവി പറഞ്ഞു.
“ഇത് ഞങ്ങൾക്ക് വലിയൊരു വേദനയാണ്, കാരണം അവൻ ടീമിലെ അത്യന്താപേക്ഷിതമായ കളിക്കാരനാണ്. താൻ ടീമിന് എത്രത്തോളം പ്രധാനപ്പെട്ടവനാണെന്ന് മനസ്സിലാക്കിയതുകൊണ്ട് ഡ്രസ്സിംഗ് റൂമിൽ വെച്ച് അവൻ വളരെ അസ്വസ്ഥനായിരുന്നു,” ഗവി കൂട്ടിച്ചേർത്തു. അവൻ എത്രനാൾ പുറത്തിരിക്കുമെന്ന് തനിക്കറിയില്ലെന്നും, എന്നാൽ തങ്ങൾക്ക് അവനെ ആവശ്യമായതുകൊണ്ട് എത്രയും വേഗം തിരിച്ചെത്താൻ സാധിക്കട്ടെ എന്ന് പ്രാർത്ഥിക്കുന്നതായും താരം വ്യക്തമാക്കി.
ലമിൻ യമാൽ കുറഞ്ഞത് അഞ്ച് ആഴ്ചയെങ്കിലും കളിക്കളത്തിൽ നിന്ന് വിട്ടുനിൽക്കേണ്ടി വരുമെന്നാണ് റിപ്പോർട്ടുകൾ സൂചിപ്പിക്കുന്നത്.