2026 ഫിഫ ലോകകപ്പിൽ അമേരിക്ക കിരീടം നേടുമെന്ന് പ്രവചിച്ച് മുൻ സ്വീഡൻ താരം സ്ലാട്ടൻ ഇബ്രാഹിമോവിച്ച്. അർജന്റീന, ഫ്രാൻസ്, സ്പെയിൻ, ബ്രസീൽ തുടങ്ങിയ പരമ്പരാഗത കരുത്തരെ തള്ളിക്കളഞ്ഞാണ് ഇബ്രാഹിമോവിച്ചിന്റെ ഈ അഭിപ്രായപ്രകടനം. ആദ്യ മത്സരത്തിൽ പരാഗ്വെയെ 4-1 ന് പരാജയപ്പെടുത്തിയ അമേരിക്ക, തൊട്ടുപിന്നാലെ ഓസ്ട്രേലിയയെ 2-0 ന് തോൽപിച്ച് നോക്കൗട്ട് ഉറപ്പിക്കുകയും ചെയ്തിരുന്നു.
ഓസ്ട്രേലിയക്കെതിരായ വിജയത്തിന് ശേഷം, അമേരിക്കയ്ക്ക് ലോകകപ്പ് നേടാൻ സാധിക്കുമെന്ന് കരുതുന്നുണ്ടോ എന്ന ചോദ്യത്തിന് “അതെ” എന്ന് മാത്രമായിരുന്നു ഇബ്രാഹിമോവിച്ചിന്റെ മറുപടി.
Also Read: ലയണൽ മെസ്സിയുടെ പിതാവ് മരിച്ചെന്ന് വ്യാജവാർത്ത; അർജന്റീനയിലെ കായിക അവതാരകൻ രാജിവെച്ചു
‘ഇതുവരെ വിശ്വസിച്ചിട്ടില്ലെങ്കിൽ, വിശ്വസിക്കാൻ തുടങ്ങിക്കൊള്ളൂ’
ഫോക്സ് സ്പോർട്സിനോട് സംസാരിക്കവെ അദ്ദേഹം ടീമിന്റെ പ്രകടനത്തെ അഭിനന്ദിക്കുകയും ആരാധകരോട് ടീമിൽ വിശ്വസിക്കാൻ ആവശ്യപ്പെടുകയും ചെയ്തു. “ഇതുവരെ നിങ്ങൾ വിശ്വസിച്ചിട്ടില്ലെങ്കിൽ, ഞാൻ വീണ്ടും പറയുന്നു; വിശ്വസിക്കാൻ തുടങ്ങിക്കൊള്ളൂ,” അദ്ദേഹം പറഞ്ഞു.
“ലോകകപ്പിന് മുൻപ് എന്താണ് സംഭവിച്ചത് എന്നതല്ല, ഇപ്പോൾ എന്താണ് സംഭവിക്കുന്നത് എന്നതാണ് പ്രധാനം. ഇപ്പോൾ ടീമിന് ലഭിച്ചിരിക്കുന്ന ആത്മവിശ്വാസം അവർ നിലനിർത്തണം. നോക്കൗട്ട് ഉറപ്പിച്ച സ്ഥിതിക്ക് അടുത്ത മത്സരത്തിൽ ചില താരങ്ങൾക്ക് വിശ്രമം നൽകാം. കാര്യങ്ങൾ നല്ല രീതിയിലാണ് പോകുന്നത്,” ഇബ്രാഹിമോവിച്ച് കൂട്ടിച്ചേർത്തു.
ഓസ്ട്രേലിയക്കെതിരായ മത്സരത്തിൽ 11-ാം മിനിറ്റിൽ കാമറൂൺ ബർഗസ് വഴങ്ങിയ സെൽഫ് ഗോളിലൂടെയാണ് അമേരിക്ക മുന്നിലെത്തിയത്. ആദ്യ പകുതി അവസാനിക്കുന്നതിന് രണ്ട് മിനിറ്റ് മുൻപ് അലക്സ് ഫ്രീമാൻ നേടിയ ഹെഡർ ഗോൾ ടീമിന്റെ വിജയം ഉറപ്പിച്ചു.
മത്സരത്തിന് ശേഷം സംസാരിച്ച യുഎസ് പരിശീലകൻ മൗറീഷ്യോ പോച്ചെറ്റിനോ ഇപ്രകാരം പറഞ്ഞു: “നമുക്ക് വിശ്വസിക്കുന്നത് തുടരണം. ഓരോ ദിവസവും ആദ്യ ദിനമെന്ന പോലെ സമീപിക്കണം. നമുക്ക് ജയിക്കാൻ കഴിയുമെന്ന് ഉറച്ചു വിശ്വസിക്കുക. കഠിനാധ്വാനം ചെയ്ത് അടുത്ത മത്സരത്തിലേക്ക് തയ്യാറെടുക്കുക.”
“എന്റെ വീക്ഷണങ്ങളിലോ സ്വപ്നങ്ങളിലോ മാറ്റമൊന്നുമില്ല. മികച്ച പ്രകടനം കാഴ്ചവെച്ച് വിജയിക്കുമ്പോൾ എല്ലാം കൂടുതൽ എളുപ്പമാകുന്നു.”
“അതേസമയം നമ്മൾ വിശ്വാസം കൈവിടരുത്. ഒരു മത്സരം കഴിഞ്ഞ് മൂന്ന് പോയിന്റുമായി നിന്നപ്പോൾ നമ്മൾ സംസാരിച്ചതാണ്. ഇപ്പോൾ രണ്ട് മത്സരങ്ങൾ കഴിഞ്ഞ് ആറ് പോയിന്റായി. അടുത്തതിനായി തയ്യാറെടുത്ത് നല്ല നിലയിൽ തുടരണം.”
“നമ്മൾ കഠിനാധ്വാനം ചെയ്യണം, ഉത്തരവാദിത്തത്തോടെയും അച്ചടക്കത്തോടെയും പ്രവർത്തിക്കണം. സ്വയം കൂടുതൽ മെച്ചപ്പെടാൻ സമ്മർദ്ദം ചെലുത്തണം, അല്ലാതെ വിശ്രമിക്കാൻ പാടില്ല.”
“എന്റെ ടീമിലെ കളിക്കാരുടെ ഗെയിം ഐക്യു (IQ) വളരെ ഉയർന്നതാണ്. കോച്ചിങ് സ്റ്റാഫ് എന്ന നിലയിൽ ഞങ്ങൾ അവർക്ക് കൃത്യമായ പിന്തുണ നൽകുന്നുണ്ട്. ഇതേ രീതിയിൽ തന്നെ മുന്നോട്ട് പോകാനാണ് തീരുമാനം,” അദ്ദേഹം വ്യക്തമാക്കി.