അൾജീരിയയ്ക്കെതിരായ മത്സരത്തിൽ തകർപ്പൻ പ്രകടനമാണ് ലയണൽ മെസ്സി പുറത്തെടുത്തത്. താൻ ഇന്നും ലോക ഫുട്ബോളിലെ മികച്ച കളിക്കാരനാണെന്നും യുവതാരങ്ങൾ ഇനിയും കാത്തിരിക്കണമെന്നും മെസ്സി ഈ മത്സരത്തിലൂടെ തെളിയിച്ചു. എന്നാൽ, ഹാട്രിക് നേടി തിളങ്ങിയെങ്കിലും, മത്സരത്തിനിടെ മെസ്സി നടത്തിയ ഒരു ഫൗൾ വലിയ ചർച്ചകൾക്ക് വഴിവെച്ചു. കടുത്ത രീതിയിലുള്ള ആ ഫൗളിന് മെസ്സിക്ക് ചുവപ്പ് കാർഡ് ലഭിക്കേണ്ടതായിരുന്നു എന്ന തരത്തിൽ ആരാധകർക്കിടയിൽ വിമർശനമുയർന്നു.
ആദ്യ പകുതിയിൽ അൾജീരിയൻ താരം ഐസ മണ്ടിയുടെ കാലിൽ മെസ്സി ചവിട്ടിയതിനെ തുടർന്ന് അൾജീരിയൻ താരങ്ങളും ആരാധകരും ശക്തമായ പ്രതിഷേധം ഉയർത്തിയെങ്കിലും റഫറി നടപടിയൊന്നും സ്വീകരിച്ചില്ല. 31-ാം മിനിറ്റിലായിരുന്നു സംഭവം. പന്ത് തട്ടിയെടുക്കാൻ ശ്രമിക്കുന്നതിനിടെയാണ് മെസ്സി അൾജീരിയൻ താരത്തെ പുറകിൽ നിന്ന് വീഴ്ത്തിയത്.
ഫൗളിന് ശേഷം വേദനയിൽ പുളയുന്ന മണ്ടിയുടെ അടുത്തെത്തി മെസ്സി ഉടൻ തന്നെ കാര്യങ്ങൾ അന്വേഷിച്ചു. താൻ ചെയ്തത് അൽപ്പം കടുത്തതായിപ്പോയെന്ന് തിരിച്ചറിഞ്ഞ മെസ്സി, താരം സുഖമായിരിക്കുന്നുവെന്ന് ഉറപ്പുവരുത്തിയ ശേഷം നിരാശയോടെ തലകുനിച്ചു നടന്നു പോകുന്നതും കാണാമായിരുന്നു.
ഏതായാലും, മെസ്സിയുടെ ഈ നടപടി കടുത്ത ഫൗൾ തന്നെയായിരുന്നുവെന്നും അതിന് ശിക്ഷ ലഭിക്കാത്തതിൽ വലിയൊരു വിഭാഗം ആരാധകർ അതൃപ്തി രേഖപ്പെടുത്തുകയും ചെയ്തു.
ഇതു കൂടി വായിക്കൂ – ലോകകപ്പിൽ കൂടുതൽ ഗോൾ നേടുന്ന താരമെന്ന മിറോസ്ലാവ് ക്ലോസെയുടെ റെക്കോർഡിനൊപ്പം ലയണൽ മെസ്സി; അൾജീരിയക്കെതിരെ അർജന്റീനക്ക് 3-0 വിജയം
ചരിത്രം കുറിച്ച് ലയണൽ മെസ്സി
അൾജീരിയയ്ക്കെതിരായ ഹാട്രിക്കിലൂടെ തന്റെ ലോകകപ്പ് കരിയറിൽ മറ്റൊരു വലിയ നേട്ടം കൂടി മെസ്സി സ്വന്തമാക്കി. ലോകകപ്പ് ചരിത്രത്തിൽ ഏറ്റവുമധികം ഗോൾ നേടുന്ന താരമെന്ന റെക്കോർഡിനൊപ്പമാണ് അർജന്റീന ക്യാപ്റ്റൻ എത്തിയത്. ജർമ്മൻ ഇതിഹാസം മിറോസ്ലാവ് ക്ലോസെയുടെ 16 ഗോളുകൾ എന്ന റെക്കോർഡിനൊപ്പമാണ് മെസ്സിയും എത്തിയത്.
ബ്രസീലിയൻ ഇതിഹാസം റൊണാൾഡോ നസാരിയോയുടെ 15 ഗോളുകൾ എന്ന റെക്കോർഡിനെ ഈ ഹാട്രിക്കിലൂടെ മെസ്സി മറികടന്നു. ജർമ്മനിയുടെ ഗെർഡ് മുള്ളർ, ഫ്രാൻസിന്റെ കിലിയൻ എംബാപ്പെ എന്നിവർ 14 ഗോളുകളുമായി പിന്നിലാണ്.
അതേസമയം, വിജയിച്ചെങ്കിലും അമിത ആത്മവിശ്വാസം വേണ്ടെന്ന് അർജന്റീന പരിശീലകൻ ലയണൽ സ്കലോനി മുന്നറിയിപ്പ് നൽകി. അമിത ആത്മവിശ്വാസം പുലർത്തിയാൽ ഏത് ടീമിനും അർജന്റീനയെ തോൽപ്പിക്കാൻ കഴിയുമെന്നും, എന്നാൽ കൃത്യമായി കളിച്ചാൽ അർജന്റീനയെ തോൽപ്പിക്കാൻ പ്രയാസമാണെന്നും അദ്ദേഹം പറഞ്ഞു.
“ആർക്കും ഞങ്ങളെ തോൽപ്പിക്കാൻ കഴിയുമെന്ന് ഈ ടീമിന് അറിയാം. ചെറിയ അമിത ആത്മവിശ്വാസം മതി ഏത് എതിരാളിക്കും വിജയിക്കാൻ. ഈ ലോകകപ്പിൽ പല അപ്രതീക്ഷിത കാര്യങ്ങളും സംഭവിക്കുന്നുണ്ട്. കാര്യങ്ങൾ കൃത്യമായി ചെയ്താൽ ഞങ്ങളെ തോൽപ്പിക്കുക പ്രയാസമായിരിക്കും,” റോയിട്ടേഴ്സിനോട് സംസാരിക്കവെ സ്കലോനി പറഞ്ഞു.