മാഞ്ചസ്റ്റർ യുണൈറ്റഡിന്റെ സ്ഥിരം മുഖ്യ പരിശീലകനായി മൈക്കൽ കാരിക്കിനെ നിയമിച്ചു. രണ്ട് വർഷത്തേക്കാണ് അദ്ദേഹവുമായി ക്ലബ്ബ് കരാർ ഒപ്പിട്ടിരിക്കുന്നത്. ഇടക്കാല പരിശീലകനായി ചുമതലയേറ്റ ശേഷം ടീമിനെ മികച്ച രീതിയിൽ മുന്നോട്ട് നയിച്ചതും ചാമ്പ്യൻസ് ലീഗ് യോഗ്യത നേടിക്കൊടുത്തതുമാണ് കാരിക്കിന് സ്ഥിരം സ്ഥാനം ലഭിക്കാൻ കാരണമായത്. അലക്സ് ഫെർഗൂസന്റെ വിരമിക്കലിന് ശേഷം യുണൈറ്റഡിന്റെ ഏഴാമത്തെ സ്ഥിരം പരിശീലകനാണ് കാരിക്.
കഴിഞ്ഞ 16 മത്സരങ്ങളിൽ 11 വിജയങ്ങളാണ് കാരിക്കിന് കീഴിൽ ടീം സ്വന്തമാക്കിയത്. ലീഗിൽ 15-ാം സ്ഥാനത്തായിരുന്ന യുണൈറ്റഡിനെ മൂന്നാം സ്ഥാനത്തേക്ക് ഉയർത്താൻ അദ്ദേഹത്തിന് സാധിച്ചു. മാഞ്ചസ്റ്റർ സിറ്റി, ആഴ്സണൽ, ലിവർപൂൾ തുടങ്ങിയ വമ്പൻ ടീമുകൾക്കെതിരായ ജയങ്ങൾ ആരാധകർക്കിടയിൽ അദ്ദേഹത്തിന് വലിയ സ്വീകാര്യതയാണ് നൽകിയത്. ക്ലബ്ബിന്റെ ചരിത്രത്തെയും പാരമ്പര്യത്തെയും ഉൾക്കൊള്ളുന്ന കാരിക്കിന്റെ ശൈലി മാനേജ്മെന്റിനും ബോധ്യപ്പെട്ടിട്ടുണ്ട്.
ഒരു മുൻ യുണൈറ്റഡ് താരം കൂടിയായ കാരിക്, ടീമിലെ പ്രമുഖ കളിക്കാരായ കോബി മെയ്നു, കാസെമിറോ, ബെഞ്ചമിൻ സെസ്കോ എന്നിവരുടെ പ്രകടനം മെച്ചപ്പെടുത്തുന്നതിലും നിർണ്ണായക പങ്കുവഹിച്ചു. മുൻ പരിശീലകരെപ്പോലെ കാരിക്കിനും ക്ലബ്ബിന്റെ നഷ്ടപ്രതാപം വീണ്ടെടുക്കുക എന്ന വലിയ ഉത്തരവാദിത്തമാണുള്ളത്. ഈ ദൗത്യത്തിൽ താൻ പൂർണ്ണ സജ്ജനാണെന്നും ക്ലബ്ബിന്റെ വലിയ ലക്ഷ്യങ്ങൾക്കായി താൻ പോരാടുമെന്നും കാരിക് വ്യക്തമാക്കി.