അൽ നസറിനൊപ്പം തൻ്റെ കന്നി കിരീടം സ്വന്തമാക്കി സൂപ്പർ താരം ക്രിസ്റ്റ്യാനോ റൊണാൾഡോ ചരിത്രം കുറിച്ചു. ദമാകിനെതിരായ മത്സരത്തിൽ ഒന്നിനെതിരെ നാല് ഗോളുകൾക്ക് വിജയിച്ചതോടെയാണ് സൗദി പ്രോ ലീഗ് കിരീടം അൽ നസർ സ്വന്തമാക്കിയത്. റൊണാൾഡോ ടീമിലെത്തിയ ശേഷം ക്ലബ്ബ് നേടുന്ന ആദ്യ പ്രധാന കിരീടമാണിത്.
മത്സരത്തിൽ റൊണാൾഡോ രണ്ട് ഗോളുകൾ നേടി തിളങ്ങി. സാദിയോ മാനെയും കിങ്സ്ലി കോമനും ഓരോ ഗോൾ വീതം നേടി ടീമിൻ്റെ വിജയം ഉറപ്പിച്ചു. രണ്ടാം പകുതിയിൽ മനോഹരമായ ഫ്രീ കിക്കിലൂടെയും പിന്നീട് ബോക്സിനുള്ളിൽ നിന്നുള്ള ഷോട്ടിലൂടെയുമായിരുന്നു റൊണാൾഡോയുടെ ഗോളുകൾ. ഈ വിജയത്തോടെ അൽ ഹിലാലിനെ രണ്ട് പോയിന്റ് പിന്നിലാക്കി അൽ നസർ ലീഗിൽ ഒന്നാമതെത്തി.
തൻ്റെ കരിയറിലെ മികച്ച നേട്ടങ്ങൾക്കിടയിൽ നിൽക്കുന്ന റൊണാൾഡോ, ലോകകപ്പ് ടീമിൽ ഇടംനേടിയതിന് പിന്നാലെയാണ് ഈ കിരീട നേട്ടവും സ്വന്തമാക്കുന്നത്. ടീമിൻ്റെ പതിനൊന്നാമത്തെ ലീഗ് കിരീടമാണിത്. 2019-ന് ശേഷം ആദ്യമായാണ് അൽ നസർ സൗദി ലീഗ് ചാമ്പ്യന്മാരാകുന്നത്. വിജയത്തിന് ശേഷം വൈകാരികമായാണ് താരം ഗ്രൗണ്ടിൽ നിന്ന് മടങ്ങിയത്.