തന്റെ ഭാവിയെക്കുറിച്ചുള്ള അഭ്യൂഹങ്ങൾക്ക് മറുപടിയുമായി ചെൽസി താരം മാർക്ക് കുകുറെല്ല രംഗത്തെത്തി. ബാഴ്‌സലോണ, അത്‌ലറ്റിക്കോ മാഡ്രിഡ് തുടങ്ങിയ ക്ലബ്ബുകളിൽ നിന്ന് തനിക്കായി താല്പര്യങ്ങൾ ഉയരുന്നുണ്ടെങ്കിലും, ചെൽസിയിൽ താൻ പൂർണ്ണ സംതൃപ്തനാണെന്ന് സ്പാനിഷ് ഡിഫൻഡർ വ്യക്തമാക്കി.

സ്പെയിനിൽ ഈ ലെഫ്റ്റ് ബാക്കിന്റെ ഭാവിയെച്ചൊല്ലി സമീപ ആഴ്ചകളിൽ വലിയ ചർച്ചകളാണ് നടക്കുന്നത്. എന്നാൽ, നിലവിൽ തന്റെ ക്ലബ്ബിലെ പ്രകടനത്തിലും വരാനിരിക്കുന്ന ലോകകപ്പിനായുള്ള തയ്യാറെടുപ്പുകളിലുമാണ് ശ്രദ്ധ കേന്ദ്രീകരിക്കുന്നതെന്ന് അദ്ദേഹം പറഞ്ഞു.

“ഞാൻ ഇത്തരം വാർത്തകൾ വായിക്കാറില്ല, അതിൽ ശ്രദ്ധിക്കാറുമില്ല. എന്നോട് ഒന്നും പറയേണ്ടതില്ലെന്ന് എന്റെ ഏജന്റുമാർക്ക് അറിയാം. ഞാൻ ഇപ്പോഴുള്ള സ്ഥലത്ത് വളരെ സന്തോഷവാനാണ്, എന്റെ കുടുംബവും അങ്ങനെതന്നെയാണ്,” കുകുറെല്ല വ്യക്തമാക്കി.

“എന്താണോ സംഭവിക്കാൻ പോകുന്നത് അത് സംഭവിക്കും. നിലവിൽ എന്റെ ശ്രദ്ധ ലോകകപ്പിലാണ്. എന്റെ ആദ്യ ലോകകപ്പ് അനുഭവമാണിത്, ഇത് ആസ്വദിക്കുകയാണ് ഞാൻ. ഒരുപക്ഷേ ഇതൊരുപക്ഷേ അവസാനത്തേതാകാനും സാധ്യതയുണ്ട്,” താരം കൂട്ടിച്ചേർത്തു.

ചെൽസിയുടെ പുതിയ മാനേജർ സാബി അലോൺസയുടെ നേതൃത്വത്തിലുള്ള പ്രവർത്തനങ്ങളെക്കുറിച്ചും താരം സംസാരിച്ചു. പരിശീലകനുമായി താൻ ഇതിനകം സംസാരിച്ചുവെന്നും അദ്ദേഹത്തിന്റെ ആശയങ്ങൾ വളരെ ആകർഷകമാണെന്നും കുകുറെല്ല അഭിപ്രായപ്പെട്ടു.

“അതെ, ഞാൻ അദ്ദേഹവുമായി സംസാരിച്ചു. അദ്ദേഹം എനിക്ക് വലിയ ആത്മവിശ്വാസമാണ് നൽകിയത്. നേരത്തെ അദ്ദേഹത്തിനൊപ്പം പ്രവർത്തിച്ചിട്ടുള്ള ഗ്രിമാൾഡോയോടും ബോർജയോടും ഞാൻ സംസാരിച്ചിരുന്നു. അദ്ദേഹത്തെക്കുറിച്ച് വളരെ നല്ല അഭിപ്രായമാണ് അവർ പറഞ്ഞത്. ടീമിന്റെ ഈ പദ്ധതി വളരെ രസകരമായി തോന്നുന്നു,” കുകുറെല്ല വ്യക്തമാക്കി.