യൂറോപ്പിലെ ഏറ്റവും മികച്ച സെറ്റ്-പീസ് ടീമായ ആഴ്‌സനലിനെ നേരിടാൻ പിഎസ്‌ജി പ്രത്യേക തയ്യാറെടുപ്പുകൾ നടത്തുന്നതായി ടീം ക്യാപ്റ്റൻ മാർക്കിഞ്ഞോസ് പറഞ്ഞു. സെറ്റ്-പീസുകളെ പ്രതിരോധിക്കുന്നതിനായി കൂടുതൽ സമയം ടീം മാറ്റിവെച്ചിട്ടുണ്ടെന്നും അദ്ദേഹം വ്യക്തമാക്കി.

“ഞങ്ങൾ കഠിനമായി പരിശ്രമിക്കുന്നുണ്ട്. കഴിഞ്ഞ കുറച്ചു വർഷങ്ങളായി പലതവണ ആഴ്‌സനലിനെതിരെ കളിച്ചിട്ടുള്ളവരാണ് ഞങ്ങൾ. അവരുടെ കരുത്തും, ആഴ്‌സനലിനെതിരെ കളിക്കുമ്പോഴുള്ള വെല്ലുവിളികളും ഞങ്ങൾക്ക് വ്യക്തമായി അറിയാം,” മാർക്കിഞ്ഞോസ് പറഞ്ഞു.

“ഒരു മത്സരത്തിൽ എന്തും സംഭവിക്കാം. അതിനാൽ ഏത് സാഹചര്യത്തെയും നേരിടാൻ ഞങ്ങൾ തയ്യാറായിരിക്കണം. ലിവർപൂൾ, ബയേൺ, ചെൽസി തുടങ്ങിയ ടീമുകൾക്കെതിരെ കളിച്ചപ്പോൾ ഞങ്ങൾക്ക് പല ബുദ്ധിമുട്ടുകളും നേരിടേണ്ടി വന്നിട്ടുണ്ട്. എന്നാൽ ആ സാഹചര്യങ്ങളെ ഞങ്ങൾ അതിജീവിക്കുകയും പാഠങ്ങൾ ഉൾക്കൊള്ളുകയും ചെയ്തിട്ടുണ്ട്.”

“തീവ്രതയുള്ള ഇത്തരം മത്സരങ്ങളിൽ ചെറിയ കാര്യങ്ങൾ പോലും നിർണ്ണായകമാണ്. ആക്രമിക്കാനും പ്രതിരോധിക്കാനും കൗണ്ടർ അറ്റാക്കുകൾ നടത്താനും സെറ്റ്-പീസുകളിൽ ശ്രദ്ധ കേന്ദ്രീകരിക്കാനും ഞങ്ങൾക്കറിയണം. ആ തയ്യാറെടുപ്പുകളെല്ലാം ഞങ്ങൾ നടത്തിക്കഴിഞ്ഞു,” മാർക്കിഞ്ഞോസ് കൂട്ടിച്ചേർത്തു.

ഒറ്റ സെറ്റ്-പീസിലൂടെ തീരുമാനിക്കപ്പെടാവുന്ന മത്സരമാണിതെന്ന് മാർക്കിഞ്ഞോസ് അഭിപ്രായപ്പെട്ടു.