റയൽ മാഡ്രിഡിലെ കിലിയൻ എംബാപ്പെയുടെ പ്രകടനത്തെക്കുറിച്ചുള്ള തന്റെ അഭിപ്രായങ്ങൾ പങ്കുവെച്ച് മുൻ ഫ്രഞ്ച് പ്രതിരോധതാരം മാർസൽ ദേശായി.

2024 വേനൽക്കാലത്ത് പി.എസ്.ജിയിൽ നിന്ന് റയൽ മാഡ്രിഡിലേക്ക് മാറിയ ഫ്രഞ്ച് ഫോർവേഡ് ഇപ്പോൾ ക്ലബ്ബിലെ തന്റെ രണ്ടാം സീസണിലാണ് കളിക്കുന്നത്.

“റയൽ മാഡ്രിഡിൽ ചേർന്നതോടെ അദ്ദേഹം തന്റെ സ്വപ്നം സാക്ഷാത്കരിച്ചു എന്ന് ഞാൻ കരുതുന്നു. എങ്കിലും ചില പേടിസ്വപ്നങ്ങൾ അദ്ദേഹത്തെ വേട്ടയാടിയിട്ടുണ്ടാകാം. കാരണം, നിങ്ങൾ റയൽ മാഡ്രിഡിലേക്ക് മാറുമ്പോൾ, നിങ്ങൾ പിന്തുണച്ചിരുന്ന പഴയ ക്ലബ്ബ് [പി.എസ്.ജി] ചാമ്പ്യൻസ് ലീഗ് നേടുന്നു, നിങ്ങളുടെ ഏറ്റവും അടുത്ത സുഹൃത്ത് (ഉസ്മാൻ ഡെംബലെ) ബാലൺ ഡി ഓർ സ്വന്തമാക്കുന്നു! പക്ഷേ, കളിയോടുള്ള അഭിനിവേശം നിലനിർത്താൻ എംബാപ്പെക്ക് കൃത്യമായ ബോധമുണ്ടെന്ന് ഞാൻ വിശ്വസിക്കുന്നു,” ദേശായി പറഞ്ഞു.

“പി.എസ്.ജി വിട്ടതിന് ശേഷമുള്ള അദ്ദേഹത്തിന്റെ തുടക്കം മികച്ചതായിരുന്നു: എല്ലാ മത്സരങ്ങളിൽ നിന്നുമായി 44 ഗോളുകൾ അദ്ദേഹം നേടി, അത് അവിശ്വസനീയമാണ്. മാഡ്രിഡിലെത്തിയ അടുത്ത വർഷവും അദ്ദേഹം മികച്ച നിലവാരത്തിലാണ് കളിച്ചത്, എന്നാൽ കിരീടനേട്ടം കൈവരിക്കാൻ അദ്ദേഹത്തിനായില്ല,” ദേശായി കൂട്ടിച്ചേർത്തു.