ഫ്രാൻസിനെതിരായ ഫിഫ ലോകകപ്പ് ഉദ്ഘാടന മത്സരത്തിന് മുന്നോടിയായി അമേരിക്കയിലുള്ള പ്രവാസി സെനഗൽ ആരാധകരോട് പിന്തുണ അഭ്യർത്ഥിച്ച് സെനഗൽ ഫുട്ബോൾ ടീം മുഖ്യ പരിശീലകൻ പേപ് തിയാവ്.

വിസ നിയന്ത്രണങ്ങൾ കാരണം സെനഗലിൽ നിന്നും മറ്റ് ആഫ്രിക്കൻ രാജ്യങ്ങളിൽ നിന്നുമുള്ള ആരാധകർക്ക് ഇത്തവണ ലോകകപ്പ് വേദികളിലെത്താൻ സാധിക്കില്ല. ഇതോടെ ‘ടെറംഗ ലയൺസ്’ എന്ന് വിളിക്കപ്പെടുന്ന സെനഗൽ ടീമിന് പതിവ് പോലെ കടുത്ത ആരാധക പിന്തുണ സ്റ്റേഡിയത്തിൽ ലഭിക്കില്ലെന്ന് ഉറപ്പായി. പ്രധാന ടൂർണമെന്റുകളിൽ ഗാലറിയിൽ ആവേശകരമായ അന്തരീക്ഷം സൃഷ്ടിക്കുന്ന ‘ഗൈൻഡെ’ (Gaindé) ഉൾപ്പെടെയുള്ള ആരാധക കൂട്ടായ്മകൾക്കും ഇത്തവണ എത്താനാവില്ല.

തങ്ങളുടെ പരമ്പരാഗത ആരാധകരുടെ അഭാവം ടീമിന് തിരിച്ചടിയാണെന്ന് പേപ് തിയാവ് സമ്മതിച്ചു. എങ്കിലും വടക്കേ അമേരിക്കയിൽ താമസിക്കുന്ന സെനഗൽ വംശജർ ടീമിന് ശക്തമായ പിന്തുണ നൽകണമെന്ന് അദ്ദേഹം ആവശ്യപ്പെട്ടു.

“ഇതൊരു രാഷ്ട്രീയ വിഷയമാണ്, പൊതുവെ ഞാൻ കായിക വിഷയങ്ങളിൽ മാത്രം ശ്രദ്ധിക്കാൻ ആഗ്രഹിക്കുന്നു. എങ്കിലും ആരാധകർ കൂടെയുണ്ടായിരുന്നെങ്കിൽ എന്ന് ആഗ്രഹിക്കുന്നു. പ്രത്യേകിച്ചും കഠിനമായ നിമിഷങ്ങളിൽ അവർ നൽകുന്ന ഊർജ്ജം വലുതാണ്, എന്നാൽ ഇത്തവണ അവർ നമ്മുടെ കൂടെയുണ്ടാകില്ല,” തിയാവ് മാധ്യമങ്ങളോട് പറഞ്ഞു.

ഫ്രാൻസിലുള്ള സെനഗൽ ആരാധകരുടെയും വടക്കേ അമേരിക്കയിൽ ഉടനീളമുള്ള പ്രവാസി സമൂഹത്തിന്റെയും പിന്തുണയോടെ ലോകകപ്പിൽ മികച്ച പ്രകടനം കാഴ്ചവെക്കാനാണ് സെനഗൽ ലക്ഷ്യമിടുന്നത്.