റയൽ മാഡ്രിഡ് അക്കാദമിയിലൂടെ വളർന്ന റൗൾ അസെൻസിയോ ഈ വേനൽക്കാലത്ത് ക്ലബ്ബ് വിടുമെന്ന് റിപ്പോർട്ട്. പുതിയ പരിശീലകൻ ജോസ് മൗറീഞ്ഞോയുടെ കീഴിൽ ടീമിൽ സ്ഥാനം നഷ്ടപ്പെട്ടതോടെയാണ് താരത്തിന്റെ മടക്കം ഉറപ്പായതെന്ന് മാധ്യമപ്രവർത്തകൻ മിഗ്വൽ സെറാനോ വ്യക്തമാക്കുന്നു.

കഴിഞ്ഞ കുറച്ചു സീസണുകളായി പ്രതിരോധത്തിൽ നേരിടുന്ന സ്ഥിരതയില്ലായ്മ പരിഹരിക്കാൻ ടീമിനെ പൂർണ്ണമായും ഉടച്ചുവാർക്കാനാണ് പോർച്ചുഗീസ് പരിശീലകനായ മൗറീഞ്ഞോയുടെ തീരുമാനം.

ഇബ്രാഹിമ കൊണാട്ടെ, അന്റോണിയോ റൂഡിഗർ, ഡീൻ ഹുയിസെൻ, എഡർ മിലിറ്റാവോ എന്നിവരിലാണ് നിലവിൽ മൗറീഞ്ഞോയുടെ വിശ്വാസം. ഇവർക്കൊപ്പം അഞ്ചാമതൊരു മികച്ച പ്രതിരോധ താരത്തെ ടീമിലെത്തിക്കാൻ അദ്ദേഹം സജീവമായി ശ്രമിക്കുന്നുണ്ട്.

അസെൻസിയോയെ നിലനിർത്തുന്നതിന് പകരം, ഭാവിയിൽ ടീമിന് അത്യാവശ്യഘട്ടങ്ങളിൽ ഡീഗോ അഗുവോഡോ, ജോവാൻ മാർട്ടിനെസ് തുടങ്ങിയ കാസ്റ്റില താരങ്ങളെ ഉപയോഗിക്കാനാണ് കോച്ചിന്റെ പദ്ധതി.

റയൽ മാഡ്രിഡിൽ തുടരുന്നത് അസാധ്യമായാൽ, നിലവിൽ തനിക്ക് ലഭിക്കുന്ന 5 ദശലക്ഷം യൂറോ വാർഷിക ശമ്പളം നൽകാൻ കഴിയുന്ന പുതിയൊരു ക്ലബ്ബിനെ അസെൻസിയോ കണ്ടെത്തും.