ലോകകപ്പിനുള്ള തയാറെടുപ്പുകൾ തുടരുന്ന ഫ്രഞ്ച് ഫുട്ബോൾ ടീമിന്റെ വ്യാഴാഴ്ചത്തെ പ്രധാന പരിശീലന സെഷനിൽ വില്യം സലിബയും അഡ്രിയൻ റാബിയോട്ടും പങ്കെടുത്തില്ല. എങ്കിലും ഇരുതാരങ്ങളുടെയും ആരോഗ്യസ്ഥിതിയെക്കുറിച്ച് ആശങ്കപ്പെടാനില്ലെന്ന് ടീം മാനേജ്മെന്റ് അറിയിച്ചു.

റിപ്പോർട്ടുകൾ പ്രകാരം, നടുവേദനയെത്തുടർന്ന് സലിബ ചികിത്സയിലാണ്. ഫ്രാൻസ് അമേരിക്കയിലേക്ക് പുറപ്പെടുന്നതിന് മുൻപേ ഈ പ്രശ്നം മെഡിക്കൽ സംഘത്തിന്റെ നിരീക്ഷണത്തിലായിരുന്നു. പരിക്കിനെ തുടർന്ന് താരത്തിന്റെ ലോകകപ്പ് പങ്കാളിത്തം പ്രതിസന്ധിയിലാകുമെന്ന ആശങ്ക ഉയർന്നെങ്കിലും, ദിദിയർ ദെഷാംപ്‌സും മെഡിക്കൽ സംഘവും കാര്യത്തിന്റെ ഗൗരവം തള്ളിക്കളഞ്ഞു. ടൂർണമെന്റിന് ശേഷം ആഴ്സണൽ പ്രതിരോധതാരത്തിന് ശസ്ത്രക്രിയ വേണ്ടി വന്നേക്കാം.

ബോസ്റ്റണിൽ നടന്ന ഫ്രാൻസിന്റെ ആദ്യ പരിശീലന സെഷനിൽ സലിബയും റാബിയോട്ടും ടീമിനൊപ്പം ചേരുന്നതിന് പകരം ട്രെയിനർക്കൊപ്പം വ്യക്തിഗത ഫിറ്റ്നസ് പരിശീലനമാണ് നടത്തിയത്. ടീമിലെ മുഴുവൻ താരങ്ങളിൽ ഇവർ രണ്ടുപേർ മാത്രമാണ് പ്രധാന പരിശീലനത്തിൽ നിന്ന് വിട്ടുനിന്നത്. ചൊവ്വാഴ്ച സെനഗലിനെതിരായ ലോകകപ്പ് ഉദ്ഘാടന മത്സരത്തിൽ ഇരുവരും കളിക്കുമെന്നാണ് പ്രതീക്ഷിക്കുന്നത്.