കേപ് വേർഡ് ലോകകപ്പ് മത്സരത്തിന് മുന്നോടിയായി സ്പെയിനിന് ആശ്വാസം; ലമീൻ യമാലിന്റെ ആരോഗ്യനിലയിൽ നിർണായക അപ്‌ഡേറ്റ് നൽകി പരിശീലകൻ

ലോകകപ്പിന് മുന്നോടിയായുള്ള സൗഹൃദ മത്സരങ്ങളും ബാഴ്‌സലോണ താരത്തിന് നഷ്ടമായിരുന്നു. എന്നാൽ ഇപ്പോൾ യമാലിന്റെ ഫിറ്റ്‌നസിൽ ആശങ്കയില്ലെന്ന് പരിശീലകൻ വ്യക്തമാക്കി. നിക്കോ വില്യംസ്, വിക്ടർ മുനോസ് എന്നിവരുടെ കാര്യത്തിലും സമാനമായ നിലപാടാണ് ടീമിനുള്ളത്.

“ലാമിൻ പൂർണ്ണ ആരോഗ്യവാനാണ് എന്നതാണ് സന്തോഷകരമായ കാര്യം,” ഞായറാഴ്ച മാധ്യമങ്ങളോട് സംസാരിക്കവെ ഡി ലാ ഫ്യൂエン്തെ പറഞ്ഞു.

“അവൻ നിശ്ചയിച്ച പ്രക്രിയകൾ പിന്തുടരുന്നുണ്ട്. പരിക്കേറ്റ മറ്റ് സഹതാരങ്ങളെപ്പോലെ തന്നെ അവനും പരിശീലനത്തിൽ മികച്ച ഫോമിലാണ്. എല്ലാവരും ലഭ്യമാണെങ്കിലും, ആരും തന്നെ ആദ്യ ഇലവനിൽ ഉണ്ടാകില്ല,” അദ്ദേഹം കൂട്ടിച്ചേർത്തു.

കാര്യങ്ങൾ തിരക്കിട്ട് തീരുമാനിക്കാതെ, മത്സരത്തിനിടയിലെ സാഹചര്യങ്ങൾ നോക്കി ഇവർ മൂന്നുപേരെയും ഇറക്കുന്ന കാര്യത്തിൽ തീരുമാനമെടുക്കുമെന്ന് സ്പെയിൻ മാനേജർ അറിയിച്ചു.

“മത്സരം എങ്ങനെ പുരോഗമിക്കുന്നു എന്ന് നോക്കിയ ശേഷം ടീമിന് എങ്ങനെ സംഭാവന നൽകാൻ കഴിയുമെന്ന് ഞങ്ങൾ തീരുമാനിക്കും. കളിയിലെ സാഹചര്യങ്ങളെ അടിസ്ഥാനമാക്കിയുള്ള യുക്തിപരമായ തീരുമാനമായിരിക്കും അത്,” അദ്ദേഹം പറഞ്ഞു.

“അവരെ ഇതുവരെ കണ്ടിട്ടില്ലെങ്കിൽ, നാളെ നിങ്ങൾക്ക് അത് കാണാം,” അദ്ദേഹം പറഞ്ഞു.

“ടാക്റ്റിക്കൽപരമായി വളരെ മികച്ച രീതിയിൽ ക്രമീകരിച്ച ടീമാണ് കേപ് വേർഡ്. ശാരീരികക്ഷമതയിലും വേഗതയിലും അവർ മുന്നിലാണ്. കാമറൂണിനെ തോൽപ്പിച്ചാണ് അവർ വരുന്നത്. ഇത്തവണത്തെ ലോകകപ്പിലെ അട്ടിമറിക്കാരാകാൻ സാധ്യതയുള്ള ടീമാണവർ. അതുകൊണ്ടുതന്നെ നാളത്തെ മത്സരം കടുപ്പമായിരിക്കും. ഞങ്ങൾ മികച്ച പ്രകടനം തന്നെ പുറത്തെടുക്കേണ്ടി വരും,” അദ്ദേഹം കൂട്ടിച്ചേർത്തു.

ഫിഫ ലോകകപ്പ് 2026-ലെ ഗ്രൂപ്പ് എച്ചിൽ സ്പെയിൻ, കേപ് വേർഡ്, സൗദി അറേബ്യ, ഉറുഗ്വേ എന്നിവരാണുള്ളത്. തിങ്കളാഴ്ച സൗദി അറേബ്യയും ഉറുഗ്വേയും തമ്മിലുള്ള മത്സരത്തോടെയാണ് ഈ ഗ്രൂപ്പിലെ പോരാട്ടങ്ങൾ തുടങ്ങുന്നത്.