2026 ലോകകപ്പ് ഉദ്ഘാടനച്ചടങ്ങിൽ ശ്രദ്ധേയമായി ‘ലാബുബു’ പാവകളും
പ്രശസ്തമായ എസ്റ്റാഡിയോ അസ്ടെക്കയിൽ നടന്ന വിസ്മയകരമായ ഉദ്ഘാടനച്ചടങ്ങോടെ 2026 ലോകകപ്പിന് തുടക്കമായി. ചടങ്ങിലെ പ്രധാന ആകർഷണങ്ങളിൽ ഒന്ന് പ്രശസ്ത ഗായിക ഷാക്കിറയുടെ പ്രകടനമായിരുന്നു. എന്നാൽ, കാണികളുടെ ശ്രദ്ധ പിടിച്ചുപറ്റിയത് ഷാക്കിറ മാത്രമായിരുന്നില്ല.
കൊളംബിയൻ ഗായകൻ ജെ ബാൽവിന്റെ പ്രകടനത്തിന് തൊട്ടുമുമ്പായി ലോകപ്രശസ്തമായ ‘ലാബുബു’ (Laboubou) പാവകളെ സ്റ്റേഡിയത്തിൽ കാണികൾ ശ്രദ്ധിച്ചു. പിന്നീട് ഈ പാവകൾ ഒരു കളിപ്പാട്ട ലോകകപ്പ് ട്രോഫി തലയ്ക്കു മുകളിൽ ഉയർത്തുന്നതും കാണികൾ കണ്ടു.
ലോകകപ്പ് ഉദ്ഘാടനച്ചടങ്ങിൽ എന്തിനാണ് ഈ പാവകളെത്തിയതെന്ന കൗതുകം ആരാധകർക്കിടയിലുണ്ടായി. ഫിഫയുമായുള്ള ലാബുബുവിന്റെ സഹകരണത്തിന്റെ ഭാഗമായാണ് ഇവരെ സ്റ്റേഡിയത്തിൽ എത്തിച്ചത്. അമേരിക്ക, കാനഡ, മെക്സിക്കോ എന്നിവിടങ്ങളിലായി നടക്കുന്ന ടൂർണമെന്റിനെ അടയാളപ്പെടുത്തുന്നതിനായി പോപ്പ് മാർട്ടിന്റെ (POP MART) ‘ദി മോൺസ്റ്റേഴ്സ്’ (THE MONSTERS) എന്ന ജനപ്രിയ കളക്ടബിൾ കഥാപാത്രങ്ങളെ ഉൾപ്പെടുത്തി പ്രത്യേക ഫുട്ബോൾ പരമ്പര തന്നെ പുറത്തിറക്കിയിട്ടുണ്ട്.
പ്ലഷ് കീറിംഗുകൾ, വലിയ വിനൈൽ പാവകൾ, ഫുട്ബോൾ അനുബന്ധ ഉൽപ്പന്നങ്ങൾ എന്നിവയെല്ലാം ഈ ശേഖരത്തിൽ ഉൾപ്പെടുന്നു. ഇതിലെ ഒരു ലാബുബു പാവ ഫുട്ബോൾ കിറ്റ് ധരിച്ച്, ബൂട്ടുകൾ അണിഞ്ഞ് ലോകകപ്പിന്റെ ഒരു ചെറിയ മാതൃക കൈയിലേന്തി നിൽക്കുന്ന രീതിയിലാണുള്ളത്.
ലാബുബുവിനെ ‘ഫുട്ബോൾ പിച്ച്’ വരെ എത്തിക്കാനും ഫുട്ബോൾ ആരാധന, ഐക്യം, ഭാവന എന്നിവ സമന്വയിപ്പിക്കാനുമാണ് തങ്ങൾ ആഗ്രഹിച്ചതെന്ന് നോർത്ത് ആൻഡ് സൗത്ത് അമേരിക്കയിലെ പോപ്പ് മാർട്ടിന്റെ ലൈസൻസിംഗ് വിഭാഗം മേധാവി എമിലി ബ്രൗ പറഞ്ഞു. ലോകകപ്പ് ഉദ്ഘാടനച്ചടങ്ങിൽ വലിയൊരു സ്വാധീനം ചെലുത്താൻ ഈ കഥാപാത്രങ്ങൾക്ക് സാധിച്ചു.
അതുകൊണ്ടുതന്നെ, 2026 ലോകകപ്പ് ഫുട്ബോൾ ശേഖരത്തിന്റെ പ്രചാരണത്തിന്റെ ഭാഗമായാണ് ലാബുബു ഉദ്ഘാടനച്ചടങ്ങിൽ പ്രത്യക്ഷപ്പെട്ടത്.