ഇംഗ്ലണ്ടിന് വേണ്ടി കളിച്ചിരുന്ന ഗോൾകീപ്പർ ആർതർ ഒകോൺക്വോ ഇനി നൈജീരിയൻ ദേശീയ ടീമിന് വേണ്ടി ബൂട്ടണിയും. താരത്തിന്റെ രാജ്യാന്തര ടീം മാറ്റത്തിന് ഫിഫ ഔദ്യോഗികമായി അംഗീകാരം നൽകി. ഇതോടെ സൂപ്പർ ഈഗിൾസ് എന്ന് വിളിക്കപ്പെടുന്ന നൈജീരിയൻ ടീമിന് വേണ്ടി കളിക്കാൻ ഒകോൺക്വോയ്ക്ക് വഴിയൊരുങ്ങി.

തിങ്കളാഴ്ചയാണ് 24-കാരനായ താരത്തിന്റെ അപേക്ഷയിൽ ഫിഫ അന്തിമ അനുമതി നൽകിയത്. വരാനിരിക്കുന്ന രാജ്യാന്തര മത്സരങ്ങളുടെ വിൻഡോ മുതൽ താരം നൈജീരിയൻ ടീമിലേക്ക് തിരഞ്ഞെടുക്കപ്പെടാൻ യോഗ്യനായിരിക്കും.

നൈജീരിയൻ മാതാപിതാക്കളുടെ മകനായി ലണ്ടനിലെ കാംഡനിലാണ് ആർതർ ഒകോൺക്വോ ജനിച്ചത്. ആഴ്സണലിൽ കളിച്ചിരുന്ന സമയത്ത് ഇംഗ്ലണ്ടിന്റെ അണ്ടർ-18 ടീമിന് വേണ്ടി താരം മുൻപ് കളത്തിലിറങ്ങിയിട്ടുണ്ട്.