ഗോൾ നേടിയതിന് പിന്നാലെ വികാരാധീനനായി ലയണൽ മെസ്സി; വ്യക്തിജീവിതത്തിലെ പ്രയാസങ്ങളെക്കുറിച്ച് തുറന്നുപറച്ചിൽ

അൾജീരിയക്കെതിരായ മത്സരത്തിൽ ആദ്യ ഗോൾ നേടിയതിന് ശേഷം മെസ്സി വികാരാധീനനായി കാണപ്പെട്ടു. കണ്ണുനിറഞ്ഞാണ് അദ്ദേഹം തന്റെ ഗോൾ ആഘോഷിച്ചത്. എന്നാൽ ഇത് ഫുട്ബോളുമായി ബന്ധപ്പെട്ട കാര്യമല്ലെന്നും വ്യക്തിപരമായ ചില ബുദ്ധിമുട്ടുകളാണെന്നും മത്സരശേഷം അർജന്റീന ക്യാപ്റ്റൻ വ്യക്തമാക്കി.

“അതെ, ആദ്യ ഗോളിന് ശേഷം ഞാൻ കരഞ്ഞു… അത് ഫുട്ബോളുമായി ഒരു ബന്ധവുമില്ലാത്ത കാര്യമായിരുന്നു. കഴിഞ്ഞ കുറച്ചു ദിവസങ്ങൾ എനിക്ക് പ്രയാസകരമായിരുന്നു. എപ്പോഴും കൂടെ നിൽക്കുകയും കരുത്ത് പകരുകയും ചെയ്ത സഹതാരങ്ങൾക്കും ടീം അംഗങ്ങൾക്കും ഞാൻ നന്ദി പറയുന്നു,” മാൻ ഓഫ് ദ മാച്ച് പുരസ്കാരം ഏറ്റുവാങ്ങിയ ശേഷം മെസ്സി പറഞ്ഞു.

സ്റ്റേഡിയത്തിലെത്തിയ ആയിരക്കണക്കിന് ആരാധകരുടെ പിന്തുണയും മെസ്സിയെ ആവേശഭരിതനാക്കി.

“ആരാധകർക്ക് ഞാൻ നന്ദി പറയുന്നു. അർജന്റീനയുടെ ആരാധകർ അസാധാരണമാണെന്ന് അവർ വീണ്ടും തെളിയിച്ചു. അവർ സ്റ്റേഡിയം വീണ്ടും നിറച്ചിരിക്കുന്നു. 80,000 പേർ ഉണ്ടോ അതോ അതിലധികമാണോ എന്ന് എനിക്കറിയില്ല,” അദ്ദേഹം കൂട്ടിച്ചേർത്തു.

“എനിക്ക് ഫുട്ബോൾ കളിക്കാൻ വലിയ ഇഷ്ടമാണ്. കുട്ടിക്കാലം മുതലേ ഇതൊരു പാഷനാണ്. മികച്ച ഫോമിലായിരിക്കുമ്പോൾ മൈതാനത്ത് ഞാൻ എന്റെ സർവ്വസ്വവും നൽകും,” അദ്ദേഹം പറഞ്ഞു.