മാഞ്ചസ്റ്റർ യുണൈറ്റഡിന്റെ പരിശീലകനായി മൈക്കൽ കാരിക് കരാർ ഒപ്പിട്ടു. ക്ലബ്ബിന്റെ മോശം സമയത്ത് താത്കാലിക ചുമതലയേറ്റെടുത്ത കാരിക് മികച്ച പ്രകടനം പുറത്തെടുത്തതോടെയാണ് അദ്ദേഹത്തിന് രണ്ട് വർഷത്തെ സ്ഥിരം കരാർ നൽകാൻ മാനേജ്മെന്റ് തീരുമാനിച്ചത്. 2028 വരെയാണ് നിലവിൽ കരാർ കാലാവധി, കൂടാതെ ഒരു വർഷം കൂടി നീട്ടാനുള്ള അവസരവുമുണ്ട്.
റൂബൻ അമോറിമിനെ പുറത്താക്കിയ ശേഷം പ്രതിസന്ധിയിലായിരുന്ന യുണൈറ്റഡിനെ കാരിക് മികച്ച രീതിയിലാണ് തിരികെ കൊണ്ടുവന്നത്. അദ്ദേഹം ചുമതലയേറ്റ ശേഷം കളിച്ച 16 മത്സരങ്ങളിൽ 11 എണ്ണത്തിലും യുണൈറ്റഡ് വിജയിച്ചു. ടീമിന്റെ പ്രതിരോധം മെച്ചപ്പെടുത്താനും കളിക്കാരിൽ കൂടുതൽ ആത്മവിശ്വാസം നിറയ്ക്കാനും അദ്ദേഹത്തിന് കഴിഞ്ഞു. കൊബി മെയ്നുവിനെപ്പോലുള്ള യുവതാരങ്ങൾ കാരിക്കിന് കീഴിൽ മികച്ച ഫോമിലാണ്.
പ്രീമിയർ ലീഗിൽ മൂന്നാം സ്ഥാനത്തെത്താനും അതുവഴി യുവേഫ ചാമ്പ്യൻസ് ലീഗ് യോഗ്യത ഉറപ്പാക്കാനും ടീമിന് കഴിഞ്ഞു എന്നത് വലിയൊരു നേട്ടമാണ്. മുൻ പരിശീലകൻ ഒലെ ഗുണ്ണാർ സോൾഷെയറും തുടക്കത്തിൽ ഇതേപോലെ മികച്ച പ്രകടനം കാഴ്ചവെച്ചിരുന്നെങ്കിലും പിന്നീട് അത് നിലനിർത്താനായിരുന്നില്ല. അതുകൊണ്ട് തന്നെ കാരിക് ഈ വിജയം എത്രത്തോളം കാലം മുന്നോട്ട് കൊണ്ടുപോകുമെന്നാണ് ഫുട്ബോൾ ലോകം ഉറ്റുനോക്കുന്നത്.