ഇന്ത്യൻ സൂപ്പർ ലീഗിന്റെ ഭാവിയിൽ വ്യക്തത തേടി ക്ലബ്ബുകൾ: എഐഎഫ്എഫിന് സംയുക്ത കത്ത്
കൊച്ചി: ഇന്ത്യൻ സൂപ്പർ ലീഗിന്റെ (ISL) അടുത്ത സീസണിനെക്കുറിച്ചുള്ള കാര്യത്തിൽ അടിയന്തരമായി വ്യക്തത വരുത്തണമെന്ന് ആവശ്യപ്പെട്ട് എല്ലാ ഐഎസ്എൽ ക്ലബ്ബുകളും അഖിലേന്ത്യാ ഫുട്ബോൾ ഫെഡറേഷന് (AIFF) സംയുക്ത കത്ത് നൽകി. വെള്ളിയാഴ്ചയാണ് ക്ലബ്ബുകൾ തങ്ങളുടെ ആശങ്കകൾ അറിയിച്ച് സംയുക്ത പ്രസ്താവന പുറത്തിറക്കിയത്.
വൈകി ആരംഭിച്ച 2025-26 സീസൺ വ്യാഴാഴ്ചയാണ് അവസാനിച്ചത്. 14 ക്ലബ്ബുകൾക്ക് 13 മത്സരങ്ങൾ മാത്രം കളിക്കാൻ കഴിഞ്ഞ ഈ ചുരുങ്ങിയ സീസണിൽ ഈസ്റ്റ് ബംഗാൾ തങ്ങളുടെ കന്നി ഐഎസ്എൽ കിരീടം സ്വന്തമാക്കിയിരുന്നു.
“ഇന്ത്യൻ പ്രൊഫഷണൽ ഫുട്ബോളിലെ തുടർച്ചയായ അനിശ്ചിതത്വം കണക്കിലെടുത്ത്, ഈ സീസണിന് ശേഷമുള്ള ലീഗിലെ തങ്ങളുടെ പങ്കാളിത്തത്തെക്കുറിച്ച് പുനർചിന്തനം നടത്താൻ ക്ലബ്ബുകൾ നിർബന്ധിതരായിരിക്കുകയാണ്,” എന്ന് പ്രസ്താവനയുടെ തുടക്കത്തിൽ തന്നെ ക്ലബ്ബുകൾ വ്യക്തമാക്കി.
“ഇന്ത്യൻ ഫുട്ബോളിന്റെ ഭാവിയിൽ വലിയ പ്രതീക്ഷയർപ്പിച്ച് പ്രതിസന്ധികൾക്കിടയിലും ക്ലബ്ബുകൾ വലിയ നിക്ഷേപമാണ് നടത്തിയിട്ടുള്ളത്. എന്നാൽ, ഘടനാപരമായ വ്യക്തതയുടെയും വാണിജ്യപരമായ സുതാര്യതയുടെയും ദീർഘകാല കാഴ്ചപ്പാടുകളുടെയും അഭാവം ക്ലബ്ബുകളുടെ സാമ്പത്തിക, പ്രവർത്തനപരമായ നിലനിൽപ്പിനെ ബാധിക്കുന്നു,” എന്നും ക്ലബ്ബുകൾ ചൂണ്ടിക്കാട്ടി.
ഇന്ത്യൻ ഫുട്ബോളിന് വലിയൊരു അടിത്തറയുണ്ടെന്നും എന്നാൽ ലീഗിന്റെ ഘടനയെക്കുറിച്ചുള്ള അനിശ്ചിതത്വം ആശങ്കയുണ്ടാക്കുന്നുവെന്നും അവർ കൂട്ടിച്ചേർത്തു. നിലനിൽപ്പുള്ള സാമ്പത്തിക മാതൃകയാണ് ഇന്ത്യൻ ഫുട്ബോളിന് ആവശ്യമെന്നും ക്ലബ്ബുകൾ വ്യക്തമാക്കി. ഇതിനായി തങ്ങൾ തയ്യാറാക്കിയ ഒരു ബദൽ മാതൃക എഐഎഫ്എഫിന്റെ പരിഗണനയ്ക്കായി സമർപ്പിച്ചിട്ടുണ്ട്.
എഐഎഫ്എഫ് ഈ യാഥാർത്ഥ്യങ്ങൾ തിരിച്ചറിയണമെന്നും എല്ലാ പങ്കാളികളെയും ഉൾപ്പെടുത്തിക്കൊണ്ടുള്ള സുസ്ഥിരമായ ഒരു പ്രവർത്തന ചട്ടക്കൂട് രൂപീകരിക്കാൻ സഹകരിക്കണമെന്നും ആവശ്യപ്പെട്ടുകൊണ്ടാണ് സംയുക്ത പ്രസ്താവന അവസാനിക്കുന്നത്.
(പ്രസിദ്ധീകരിച്ച തീയതി: മെയ് 22, 2026)