ഫിഫ ലോകകപ്പിലെ പോർച്ചുഗലിന്റെ ആദ്യ മത്സരത്തിൽ ഡിആർ കോംഗോയ്ക്കെതിരെ ക്രിസ്റ്റ്യാനോ റൊണാൾഡോയ്ക്ക് മികച്ച പ്രകടനം പുറത്തെടുക്കാൻ സാധിച്ചിരുന്നില്ല. എന്നാൽ, അഞ്ച് തവണ ബാലൺ ഡി ഓർ ജേതാവായ റൊണാൾഡോ ശക്തമായി തിരിച്ചുവരുമെന്ന വിശ്വാസത്തിലാണ് മുൻ ഇംഗ്ലണ്ട് താരം മൈക്കൽ ഓവൻ.
“ഇതുപോലെയുള്ള സന്ദർഭങ്ങളിൽ താൻ വിമർശകരുടെ വായടപ്പിക്കുന്നത് റൊണാൾഡോ എത്രയോ തവണ നമ്മൾ കണ്ടിട്ടുള്ളതാണ്. നിങ്ങൾ റൊണാൾഡോയെ ടീമിൽ ഉൾപ്പെടുത്തുകയാണെങ്കിൽ, അദ്ദേഹത്തിന്റെ ശൈലിയെ നിങ്ങൾ അംഗീകരിച്ചേ തീരൂ. ഉസ്ബെക്കിസ്ഥാനെതിരായ അടുത്ത മത്സരത്തിൽ അദ്ദേഹം ഹാട്രിക്കുമായി തിരിച്ചുവന്നാലും എനിക്ക് അത്ഭുതം തോന്നില്ല,” മാഞ്ചസ്റ്റർ യുണൈറ്റഡിന്റെയും റയൽ മാഡ്രിഡിന്റെയും മുൻ താരം കൂടിയായ ഓവൻ പറഞ്ഞു.
ഡിആർ കോംഗോയ്ക്കെതിരായ മത്സരത്തിൽ 41-കാരനായ റൊണാൾഡോയ്ക്ക് കാര്യമായി ഒന്നും ചെയ്യാനായില്ല. മത്സരത്തിൽ 25 തവണ മാത്രമാണ് അദ്ദേഹത്തിന് പന്ത് ലഭിച്ചത്. ഗോൾ ലക്ഷ്യമാക്കി മൂന്ന് തവണ പന്തിട്ടെങ്കിലും ഒന്നും വലയിലെത്തിയില്ല. പ്രധാന ടൂർണമെന്റുകളിൽ (ലോകകപ്പ്, യൂറോ കപ്പ്) തുടർച്ചയായ 10 മത്സരങ്ങളിൽ ഗോളടിക്കാനാവാത്ത അവസ്ഥയിലാണ് റൊണാൾഡോ.
അർജന്റീനയുടെ ആദ്യ മത്സരത്തിൽ ലയണൽ മെസ്സി ഹാട്രിക് നേടിയതും, ഏർലിങ് ഹാലൻഡ്, കിലിയൻ എംബാപ്പെ, ഹാരി കെയ്ൻ എന്നിവർ ഇരട്ട ഗോളുകൾ നേടിയതും റൊണാൾഡോയുടെ പ്രകടനത്തെക്കുറിച്ചുള്ള ചർച്ചകൾക്ക് കൂടുതൽ ചൂടുപിടിപ്പിച്ചു.
റൊണാൾഡോയുടെ കളിയുടേ ശൈലിയെയും ഓവൻ പിന്തുണച്ചു. പെനാൽറ്റി ബോക്സിനുള്ളിൽ കേന്ദ്രീകരിച്ചാണ് റൊണാൾഡോയുടെ ഇപ്പോഴത്തെ കളി എന്ന് അദ്ദേഹം ചൂണ്ടിക്കാട്ടി. ബ്രൂണോ ഫെർണാണ്ടസ്, ബെർണാഡോ സിൽവ, ജോവോ നെവസ്, വിറ്റിൻഹ തുടങ്ങിയ മികച്ച മധ്യനിര താരങ്ങൾ പോർച്ചുഗലിനുണ്ട്. അതിനാൽ കളി മെനയുന്നതിനേക്കാൾ എതിർ ടീമിന്റെ പ്രതിരോധ നിരയ്ക്കിടയിൽ സ്ഥാനം പിടിക്കാനാണ് റൊണാൾഡോ ശ്രമിക്കുന്നത്.
“അദ്ദേഹം എപ്പോഴും ഇങ്ങനെയല്ലേ കളിച്ചിട്ടുള്ളത്? പ്രത്യേകിച്ച് സമീപകാലത്തായി കളി മെനയുന്നതിൽ അദ്ദേഹം കാര്യമായി ഇടപെടാറില്ല,” ഓവൻ വ്യക്തമാക്കി.
പ്രായത്തെച്ചൊല്ലിയുള്ള വിമർശനങ്ങൾ റൊണാൾഡോ നേരിടുന്നുണ്ട്. മുൻ മാഞ്ചസ്റ്റർ യുണൈറ്റഡ് താരം പോൾ സ്കോൾസ് കഴിഞ്ഞ ആഴ്ച റൊണാൾഡോ പോർച്ചുഗലിന് ഒരു “പ്രശ്നമാണെന്ന്” അഭിപ്രായപ്പെട്ടിരുന്നു. എങ്കിലും, നിർണായക നിമിഷങ്ങളിൽ മത്സരഫലം മാറ്റാൻ ഇന്നും അദ്ദേഹത്തിന് സാധിക്കുമെന്ന കാര്യത്തിൽ സംശയമില്ല.
“പ്രധാന നിമിഷങ്ങളിൽ റൊണാൾഡോ ഉണ്ടാകും. ഗോൾ നേടാനായില്ലെങ്കിൽ പെട്ടെന്ന് കുറ്റം പറയുന്നത് റൊണാൾഡോയുടെ നേർക്കാണ്. 41-ാം വയസ്സിൽ ഇത്തരം ചോദ്യങ്ങൾ സ്വാഭാവികമാണ്,” ഓവൻ കൂട്ടിച്ചേർത്തു.
റൊണാൾഡോ മാത്രമല്ല, പോർച്ചുഗൽ ടീം മൊത്തത്തിൽ മെച്ചപ്പെടാനുണ്ട്. ചൊവ്വാഴ്ച നടക്കുന്ന ഉസ്ബെക്കിസ്ഥാനെതിരായ മത്സരത്തിൽ വിജയിക്കാൻ ടീം കൂടുതൽ കരുത്തോടെയും ഒത്തൊരുമയോടെയും കളിക്കേണ്ടതുണ്ട്.