2026 ഫിഫ ലോകകപ്പ് തുടങ്ങാൻ ഇനി ദിവസങ്ങൾ മാത്രമാണ് ബാക്കി. ജൂൺ 11 മുതൽ ജൂലൈ 19 വരെയാണ് 48 ടീമുകൾ മാറ്റുരയ്ക്കുന്ന ടൂർണമെന്റ് നടക്കുന്നത്. ടൂർണമെന്റ് തുടങ്ങുന്നതിന് ഒരു മാസം മുമ്പ്, മൂന്ന് ഉദ്ഘാടന ചടങ്ങുകൾ ഉണ്ടാകുമെന്ന് ഫിഫ ഔദ്യോഗികമായി സ്ഥിരീകരിച്ചു. ടൂർണമെന്റിന് ആതിഥേയത്വം വഹിക്കുന്ന അമേരിക്ക, മെക്സിക്കോ, കാനഡ എന്നീ മൂന്ന് രാജ്യങ്ങളിലും പ്രധാനപ്പെട്ട ഉദ്ഘാടന ചടങ്ങുകൾ നടക്കും. മെക്സിക്കോയും ദക്ഷിണാഫ്രിക്കയും തമ്മിലുള്ള ഉദ്ഘാടന മത്സരത്തിന് മുന്നോടിയായി മെക്സിക്കോ സിറ്റി സ്റ്റേഡിയത്തിലാണ് ആദ്യ ചടങ്ങ് നടക്കുക.
മത്സരത്തിന് 90 മിനിറ്റ് മുമ്പ് ഉദ്ഘാടന ചടങ്ങുകൾ ആരംഭിക്കും. അന്താരാഷ്ട്ര സംഗീത രംഗത്തെ പ്രമുഖരായ അലജാൻഡ്രോ ഫെർണാണ്ടസ്, ബെലിൻഡ, ഡാനി ഓഷ്യൻ, ജെ ബാൾവിൻ, ലീല ഡൗൺസ്, ലോസ് ഏഞ്ചലസ് അസുലെസ്, മാന, ടൈല എന്നിവർ ചടങ്ങിൽ പങ്കെടുക്കും. ഫിഫ ലോകകപ്പ് 2026-ന്റെ ഔദ്യോഗിക ആൽബത്തിലെ ഗാനങ്ങൾ ഇവർ അവതരിപ്പിക്കും.
മെക്സിക്കോയിലെ ചടങ്ങിന് ശേഷം കാനഡയിലും അമേരിക്കയിലും ഉദ്ഘാടന ആഘോഷങ്ങൾ തുടരും. ബാലിച്ച് വണ്ടർ സ്റ്റുഡിയോയുമായി സഹകരിച്ചാണ് ഈ പരിപാടികൾ ഒരുക്കുന്നത്.
“സംഗീതവും നിറങ്ങളും അർത്ഥവത്തായ ആഘോഷങ്ങളുമായി മെക്സിക്കോ ലോകകപ്പിന് തുടക്കം കുറിക്കുകയാണ്. കാനഡ, മെക്സിക്കോ, അമേരിക്ക എന്നീ രാജ്യങ്ങളെ ഒന്നിപ്പിക്കുന്ന ഫുട്ബോൾ എന്ന വികാരത്തിന് ഈ ഉദ്ഘാടന ചടങ്ങ് തുടക്കമിടുന്നു,” ഫിഫ വ്യക്തമാക്കി.
ഉദ്ഘാടന ചടങ്ങ് കാണാൻ ആഗ്രഹിക്കുന്നവർ നേരത്തെ തന്നെ സ്റ്റേഡിയത്തിൽ എത്തണമെന്ന് നിർദ്ദേശമുണ്ട്. മെക്സിക്കോ-ദക്ഷിണാഫ്രിക്ക മത്സരത്തിന് നാല് മണിക്കൂർ മുമ്പ് സ്റ്റേഡിയത്തിന്റെ ഗേറ്റുകൾ തുറക്കും.
ലോകകപ്പിനെക്കുറിച്ച് അറിഞ്ഞിരിക്കേണ്ടവ
ജൂൺ 11-ന് മെക്സിക്കോ സിറ്റിയിൽ തുടങ്ങുന്ന ഫിഫ ലോകകപ്പ് 2026-ൽ 16 വേദികളിലായി 104 മത്സരങ്ങളുണ്ടാകും. ജൂലൈ 19-ന് ന്യൂയോർക്ക്-ന്യൂജേഴ്സി സ്റ്റേഡിയത്തിലാണ് ഫൈനൽ മത്സരം.
“ലോകം ഒന്നിക്കുന്ന നിമിഷമാണ് ഫിഫ ലോകകപ്പ്, അത് തുടങ്ങുന്നത് നമ്മുടെ ഉദ്ഘാടന ചടങ്ങുകളിലൂടെയാണ്,” ഫിഫ പ്രസിഡന്റ് ജിയാനി ഇൻഫാന്റിനോ പറഞ്ഞു.
“മെക്സിക്കോ സിറ്റിയിൽ തുടങ്ങി ടൊറന്റോയിലും ലോസ് ഏഞ്ചലസിലും തുടരുന്ന ചടങ്ങുകൾ സംഗീതത്തെയും സംസ്കാരത്തെയും ഫുട്ബോളിനെയും ഒന്നിപ്പിക്കും. ഓരോ രാജ്യത്തിന്റെയും തനതായ സവിശേഷതകളും ഈ ടൂർണമെന്റിന്റെ ഐക്യവും ഇതിലൂടെ പ്രകടമാകും. ഇതൊരു വലിയ ആഗോള ആഘോഷത്തിന്റെ തുടക്കമാണ്,” അദ്ദേഹം കൂട്ടിച്ചേർത്തു.