ലോകകപ്പിലെ ഏറ്റവും വലിയ ആകർഷണം ലയണൽ മെസ്സിയെന്ന് ലയണൽ സ്കലോനി

പുതിയ ലോകകപ്പ് കാമ്പെയ്‌നിന് മുന്നോടിയായി മെസ്സിയുടെ സ്വീകാര്യതയെക്കുറിച്ച് സംസാരിച്ച സ്കലോനി, അർജന്റീനയിൽ മാത്രമല്ല ലോകമെമ്പാടുമുള്ള ഫുട്ബോൾ ആരാധകർക്കിടയിൽ മെസ്സിക്ക് വലിയ സ്വാധീനമുണ്ടെന്ന് വ്യക്തമാക്കി.

“അർജന്റീനക്കാർ മാത്രമല്ല, ലോകത്തിലെ എല്ലാവർക്കും അദ്ദേഹത്തെ കളിക്കളത്തിൽ കാണാൻ ആഗ്രഹമുണ്ട്,” സ്കലോനി പറഞ്ഞു. “എല്ലാവരും അദ്ദേഹത്തെ മൈതാനത്ത് കാണാൻ ആഗ്രഹിക്കുന്നു, കാരണം അർജന്റീനൻ ആരാധകരെ മാത്രമല്ല, ലോകമെമ്പാടുമുള്ള ഫുട്ബോൾ പ്രേമികളെ സ്വാധീനിക്കാൻ അദ്ദേഹത്തിന് സാധിക്കുന്നുണ്ട്.”

“അദ്ദേഹത്തെക്കുറിച്ച് നെഗറ്റീവായി ഒന്നും പറയാനില്ല,” സ്കലോനി കൂട്ടിച്ചേർത്തു. “അദ്ദേഹം എപ്പോഴും ടീമിനൊപ്പമുണ്ട്, ഞങ്ങൾക്ക് അദ്ദേഹം അനിവാര്യനാണ്. അത് അങ്ങനെ തന്നെ തുടരും.”

Also Read – സ്‌പെയിനിന് തിരിച്ചടി; അപ്രതീക്ഷിത തന്ത്രങ്ങൾ പരാജയപ്പെട്ടതോടെ യമാലിലേക്ക് ശ്രദ്ധ തിരിച്ച് ടീം

“ഖത്തറിലെ അനുഭവങ്ങൾ അതിശയകരമായിരുന്നു. രാജ്യം മുഴുവൻ ഒന്നിച്ചു,” മെസ്സിയുടെ ദീർഘകാല സഹതാരമായ നിക്കോളാസ് ഒട്ടമെൻഡി ഓർക്കുന്നു. “അതൊക്കെ ഞങ്ങളുടെ മനസ്സിലുണ്ട്, അത് മുന്നോട്ട് പോകാനുള്ള കരുത്ത് നൽകുന്നു. വിശ്രമിക്കാൻ സമയമില്ല. ഇത്തരം മത്സരങ്ങൾക്ക് വേണ്ട എളിമയോടെ തന്നെ ഞങ്ങൾ മുന്നോട്ട് പോണം.”

മെസ്സിയെപ്പോലെ എളിമയുള്ള മറ്റൊരു സൂപ്പർതാരമില്ലെന്നും, പരിശീലനത്തിൽ മാത്രം ശ്രദ്ധ കേന്ദ്രീകരിക്കുന്ന ലളിതമനസ്കനാണ് അദ്ദേഹമെന്നും ഒട്ടമെൻഡി വിശേഷിപ്പിച്ചു.

“അദ്ദേഹം കളിക്കളത്തിൽ ഒരു പോരാളിയാണ്,” ഒട്ടമെൻഡി പറഞ്ഞു. “അദ്ദേഹത്തോടൊപ്പം കളിക്കാനും, അദ്ദേഹത്തിന് പിന്തുണ നൽകാനും ഞങ്ങൾക്ക് വലിയ ആവേശമാണ്. പന്ത് ഉരുളാൻ തുടങ്ങുമ്പോൾ ഞങ്ങൾ എല്ലാവരും ഒന്നിച്ചുചേർന്ന് ഒരു കുടുംബത്തെപ്പോലെ പോരാടേണ്ടതുണ്ട്,” അദ്ദേഹം കൂട്ടിച്ചേർത്തു.