ഗാനയുടെ മിഡ്ഫീൽഡർ തോമസ് പാർട്ടിക്ക് കാനഡയിലേക്ക് പ്രവേശിക്കാൻ അനുമതി നിഷേധിക്കപ്പെട്ടു. ഇംഗ്ലണ്ടിൽ ബലാത്സംഗം ഉൾപ്പെടെയുള്ള ക്രിമിനൽ കേസുകളിൽ വിചാരണ നേരിടുന്നതിനാലാണ് കാനഡ താരത്തിന് വിസ നിഷേധിച്ചത്. ഇതേതുടർന്ന് അടുത്ത ആഴ്ച പനാമയ്ക്കെതിരെ നടക്കുന്ന ഫിഫ ലോകകപ്പ് ഉദ്ഘാടന മത്സരത്തിൽ താരത്തിന് കളിക്കാൻ സാധിക്കില്ലെന്ന് ഫിഫ ഔദ്യോഗികമായി സ്ഥിരീകരിച്ചു.
ബലാത്സംഗം, ലൈംഗികാതിക്രമം തുടങ്ങിയ ആരോപണങ്ങളിൽ താൻ കുറ്റക്കാരനല്ലെന്ന് മുമ്പ് ആഴ്സണൽ താരമായിരുന്ന 32-കാരനായ പാർട്ടി കോടതിയിൽ വ്യക്തമാക്കിയിട്ടുണ്ട്. ഗാന ടീമിന്റെ ക്യാമ്പ് അമേരിക്കയിലാണെങ്കിലും, കാനഡയിലെ ടൊറന്റോയിൽ നടക്കുന്ന മത്സരത്തിനായി അതിർത്തി കടക്കാൻ അധികൃതർ അനുവാദം നൽകിയില്ല. വിസ കാര്യങ്ങളിൽ ഫിഫയ്ക്ക് ഇടപെടാൻ സാധിക്കില്ലെന്നും, ആതിഥേയ രാജ്യങ്ങളുടെ നിയമങ്ങളാണ് ഇതിൽ അന്തിമമെന്നും ഫിഫ അധികൃതർ വ്യക്തമാക്കി.
നിലവിൽ സ്പാനിഷ് ക്ലബ്ബായ വിയ്യറയലിന്റെ താരമായ പാർട്ടിക്ക് ഗാനയുടെ അടുത്ത മത്സരങ്ങളിൽ പങ്കെടുക്കാൻ സാധിക്കും. ജൂൺ 23-ന് ഇംഗ്ലണ്ടിനെതിരെയും, ജൂൺ 27-ന് ക്രൊയേഷ്യയ്ക്കെതിരെയും അമേരിക്കയിൽ നടക്കുന്ന മത്സരങ്ങളിൽ താരം ടീമിനൊപ്പം ചേരുമെന്നാണ് കരുതപ്പെടുന്നത്.