ഫിഫ ലോകകപ്പ് 2026-ൽ നിന്ന് നെതർലാൻഡ്സ് പുറത്തായതിന് പിന്നാലെ, ടീമിന്റെ പ്രതിരോധ തന്ത്രങ്ങളെച്ചൊല്ലി ഉയർന്ന വിമർശനങ്ങൾക്ക് മറുപടിയുമായി പരിശീലകൻ റൊണാൾഡ് കോമാൻ. മൊറോക്കോയ്ക്കെതിരായ മത്സരത്തിൽ അഞ്ച് പ്രതിരോധ താരങ്ങളെ അണിനിരത്തിയത് ഭയം കൊണ്ടല്ല, മറിച്ച് കൃത്യമായ ടാക്റ്റിക്കൽ വിശകലനത്തിന്റെ അടിസ്ഥാനത്തിലാണെന്ന് അദ്ദേഹം വ്യക്തമാക്കി.
നിശ്ചിത സമയത്തും അധിക സമയത്തും 1-1 എന്ന നിലയിൽ സമനിലയിൽ പിരിഞ്ഞ മത്സരത്തിൽ, പെനാൽറ്റി ഷൂട്ടൗട്ടിൽ 3-2 എന്ന സ്കോറിനാണ് നെതർലാൻഡ്സ് മൊറോക്കോയോട് പരാജയപ്പെട്ടത്. ഇതോടെ റൗണ്ട് ഓഫ് 32-ൽ വെച്ച് ഡച്ച് സംഘം ലോകകപ്പിൽ നിന്ന് പുറത്തായി.
മത്സരത്തിന് ശേഷം കോമാന്റെ തന്ത്രങ്ങൾ വലിയ ചർച്ചയായിരുന്നു. ആക്രമണ ഫുട്ബോളിന് പേരുകേട്ട ഡച്ച് ടീം ഈ നിർണായക മത്സരത്തിൽ അഞ്ച് പേരെ പ്രതിരോധത്തിൽ നിലനിർത്തിയത് വിമർശനങ്ങൾക്ക് കാരണമായി. ഇത് ടീമിന്റെ ആക്രമണത്തെ ദുർബലപ്പെടുത്തിയെന്നും മൊറോക്കോയ്ക്ക് കളിയുടെ നിയന്ത്രണം നൽകിയെന്നും മാധ്യമങ്ങൾ ചൂണ്ടിക്കാട്ടി.
ഗ്രൂപ്പ് മത്സരങ്ങളെ അപേക്ഷിച്ച് ഈ തന്ത്രം വഴി പ്രതിരോധത്തിൽ മികച്ച പ്രകടനമാണ് കാഴ്ചവെച്ചതെന്ന് കോമാൻ മറുപടി നൽകി. ആക്രമണത്തിൽ അല്പം കുറവ് വന്നെങ്കിലും പ്രതിരോധം മെച്ചപ്പെട്ടത് നല്ല കാര്യമാണെന്ന് അദ്ദേഹം പറഞ്ഞു.
“ഈ തന്ത്രങ്ങളെക്കുറിച്ച് നിങ്ങൾക്ക് എന്ത് വേണമെങ്കിലും ചിന്തിക്കാം. പക്ഷേ, സ്വീഡനെയും ടുണീഷ്യയെയും അപേക്ഷിച്ച് മികച്ച ടീമായ മൊറോക്കോയ്ക്കെതിരെ ഞങ്ങൾ വളരെ കുറച്ചു അവസരങ്ങൾ മാത്രമാണ് അവർക്ക് നൽകിയത്. വീണ്ടും അവസരം ലഭിച്ചാലും ഞാൻ ഇതേ രീതിയിൽ തന്നെ കളിക്കും,” അദ്ദേഹം വ്യക്തമാക്കി.
മൊറോക്കോ അവസാന നിമിഷം ഗോൾ നേടിയില്ലായിരുന്നുവെങ്കിൽ താൻ പ്രശംസിക്കപ്പെടുമായിരുന്നുവെന്ന് കോമാൻ അഭിപ്രായപ്പെട്ടു. എന്നാൽ തോൽവിക്ക് പിന്നാലെ അഞ്ച് പ്രതിരോധ താരങ്ങളെ കളിപ്പിച്ചതിന്റെ പേരിൽ താൻ വിമർശിക്കപ്പെടുകയാണെന്നും അദ്ദേഹം പറഞ്ഞു.
തനിക്കെതിരെയുള്ള വിമർശനങ്ങളെക്കുറിച്ചുള്ള ചോദ്യത്തോട് കോമാൻ രൂക്ഷമായാണ് പ്രതികരിച്ചത്. “നിങ്ങൾക്ക് വിമർശിക്കാൻ അവകാശമുണ്ട്, എന്നാൽ നിങ്ങൾ പുറത്തുനിന്നാണ് ഫുട്ബോൾ കാണുന്നത്. ടീമിനൊപ്പം നിൽക്കുന്ന എനിക്ക് എന്താണ് മെച്ചപ്പെടുത്തേണ്ടതെന്ന് അറിയാമായിരുന്നു,” അദ്ദേഹം പറഞ്ഞു.
ടീം ഭയം കൊണ്ടല്ല ഈ തന്ത്രം സ്വീകരിച്ചതെന്ന് കോമാൻ ആവർത്തിച്ചു. മുന്നേറ്റനിരയിൽ മൂന്ന് താരങ്ങളെ അണിനിരത്തിയിരുന്നുവെന്നും, പ്രതിരോധം ഭദ്രമാക്കുക മാത്രമായിരുന്നു ലക്ഷ്യമെന്നും അദ്ദേഹം കൂട്ടിച്ചേർത്തു. “ഇതൊരു ഭയമല്ല, എതിരാളികളെ വിശകലനം ചെയ്തതിന്റെ അടിസ്ഥാനത്തിലുള്ള തീരുമാനമാണ്,” അദ്ദേഹം പറഞ്ഞു.
ഈ തോൽവിക്ക് ശേഷം കോമാന്റെ ഭാവി സംബന്ധിച്ചും അദ്ദേഹത്തിന്റെ തന്ത്രങ്ങളെക്കുറിച്ചും കടുത്ത ചോദ്യങ്ങളാണ് ഉയരുന്നത്. അതേസമയം, പ്രീ ക്വാർട്ടറിലേക്ക് കടന്ന മൊറോക്കോ ശനിയാഴ്ച ഹൂസ്റ്റണിൽ വെച്ച് കാനഡയെ നേരിടും.